La Usc di Ladins

Ensëra püch do mesanöt éra passada, la Lege provinziala che porta novités ma por Südtirol tla fasa de restriziuns anti coronavirus. An pó lí fora dala lege che Balsan á impó ciaré da sté ite tla cornisc de limitaziuns nazionales, dantadöt tl setur dla hotelaria y dla scora. Impó porta la lege de gran novités, dantadöt por i eserziënc desco p.ej. ustis, frisers, estetisć... y ince i studënc che podará se möie ince fora de provinzia por sü stüdi.

Daurides ai 11 de ma
Salons da friser, barbier, zëntri d’estetica, y de chësta sort, desco ince bars, pubs, restoranc, dlaciaries, conditories dauriará les portes.
Lapró pó daurí ince i museums, i zëntri dla cultura y di jogn, y ince les biblioteches.

Daurides ai 18 de ma
Ai 18 de ma gnaral spo do i sorvisc por l’infanzia sciöche les ciases di pici, umes dl de y les scolines. La gran novité reverda davëi les scolines y scores elementares!
En cunt dles scolines y scores elementares: Te Südtirol gnaral metü sö cun la daurida dles scolines te de pici grups (grups cina 4) ince n sorvisc dla scora elementara d’emergënza te grups cina 6 mituns: al é preodü na assistënza y l’acompagnamënt de mez le de zënza dé fora spëisa. I detais gnará dá fora dala Provinzia (Junta provinziala) cun lege aposta. Por les scores mesanes y altes n’él preodü sëgn n iade cina la fin dl ann scolastich degöna "scora", ma leziuns a destanza. Ai maturandi i pól gni pité leziuns de consulënza te scora te grups cina al plü sis scolari che stá a destanza de almanco 2 metri. Scores profescionales pó pité practicums, tan inant che chisc vëgn damaná dala cualificaziun dla maestria.

Daurides ai 25 de ma
Afitaciamenes, agriturisms, hotí de chësta sort podará daurí ai 25 de ma. Ince por i implanc portamunt se dauriará la poscibilité da jí en funziun. Por la sojornanza de ghesć él da dí che la lege vel ma por Südtirol, y ara ne baia nia dla poscibilité da fá gní adalerch ghesć da fora provinzia.

 (Iaco Rigo)