La Usc di Ladins

Passa 380 sozi à tout pèrt en mèrtesc ai 5 de mé a la scontrèda en streaming che l’Apt à endrezà sun YouTube. N moment de condivijion che à abù n muie de aprijiament e che à permetù ence de fèr domanes tras la chat.

»Aon volù ve chiamar per ve dir che ence noi, desche voi, aon besegn de se sentir vejins te chest moment critich - à dit dantfora l president de l’Apt Fausto Lorenz. Demò ensema te chesta fasa de malsegureza podon jir inant, cognon creser te noi, te na Apt sul teritorie e del teritorie, cognon jir fora da chesta fasa de paura con coraje, forza e determinazion.«

»5 - 5 - 5: da la enrescida al mudament per l davegnir de la destinazion« l’à inom l document che à metù ensema l’Apt per prejentèr i scenaries turistics di meisc che vegn. »No adinfal ge é stat dat chest inom - à dit la vizepresidenta Elisa Maccagni. Canche aon pianificà chest moment no se aon sobito rendù cont che l’é stat fissà ai 5 del 5 da les 5: jan a vardèr te la numerologìa aon vedù che te la carateristiches del 5 l’é l dejiderie de esplorazion e de mudament che l’é proprio i sentimenc de l’Apt te chest moment particolèr.«

Dò la paroles de introduzion del president Lorenz l’é stat l diretor Andrea Weiss che à rejonà de l’impat de Covid-19 sul turism e de sia prospetives. Dapò à tout la parola l nef project manager Nicolò Weiss che à prejentà i resultac di doi costionères mané fora ai sozi de l’Azienda per l Turism e ai scric ite a la newsletter. Da chiò l’é vegnù fora che la maor pèrt di sozi à intenzion de orir sia strutura chest istà enceben la pecia prenotazions.

La vize presidenta Maccagni à rejonà del lurier sui desć provinzièi che se à dat jù per chierir soluzions pratiches sun trei temes fondamentèi: la distanza, la sanificazion e i despositives de protezion individuèla.

Apede chest l'é stata anunzià che i hotelieres de Fascia à pissà de ge sporjer na vacanza a dotores e operatores sanitères.
»L’é stat soraldut tel ciamp de la solidarietà che se à moet cheste setemane passade la sociazion di hotelieres de Fascia - à dit l raprejentant Patrizio Prandi. Aon aidà na onlus de Ciavaleis con didamenc de magnadiva per i ospedai de Bergamo - l’à dit - e ades metaron nosc empegn per n auter emportant projet: ge dar l met ai dotores e i operatores sanitaries de vegnir te Fascia a se passar dotrei dis de vacanza.«

De più su La Usc stampèda de vender ai 8 de mé 2020.

 (Monica Cigolla)