La Usc di Ladins

N muie de persones, massa, à perdù endèna la pandemìa de Covid-19 valgugn de cèsa, n père, na mère, n fra, o ence demò n parent. Les l’à perdù te l’acort, tel solentum, tel gran padiment de no poder nience l saludèr, ge fèr n braciacol, l compagnèr te sie ultim viac. E chisc l’é momenc de dolor che restarà stampé per semper tel cher de chi che li à vivui.

Da n muie de egn la Sociazion A.M.A. endreza gropes de auto mutuo aiut con la persones che à perdù zachei de cèsa per sporjer n spazie resservà e segur olà spartir e confrontèr sentimenc e emozions, romper l solentum e l chiet che se vif endèna duta l’esperienza de la manconia.

Tel grop la persones descour cotanta forza che pel nascer dal se scutèr e sostegnir l’un co l’auter, dal sporjer confort, dal se recognoscer te l’auter e dal spartir i vèresc sfadiousc de na neva prospetiva de vita.

Te chest moment n muie de persones se troa te la valiva situazion: no poder stèr vejin a la persona che mor, ge fajan sentir sie amor e sostegn; cogner stèr dalonc, zenza esser bogn de la veder, la scutèr, ge fèr n braciacol; no poder fèr la sepoltura, compagné da chi de cèsa, dai amisc, da la comunanza.

Per didèr a ge fèr front a chesta situazion, la Sociazion A.M.A. col prum de mé à envià via n grop de sostegn dedicà en particolèr a chi che vif na manconia per Covid-19, che te chest moment se troarà online n’outa en setemèna, ma l podarà jir inant, apenamai che l’é l met, te senta de la sociazion a Trent.

L grop vegnarà vidà da na operadora de la Sociazion A.M.A. che se cruziarà de la gestion online e la didarà i partezipanc a rejonèr tel respet e la resservateza.

Per informazions e inscinuazions se pel scriver a gruppi@automutuoaiuto.it o chiamèr l numer de telefon 342 8210353. L’A.M.A. l’é na sociazion de volontariat. La quota per doventèr sozi la é de 30 euro a l’an.

 (mci)