Jan cun la coriera dla SAD zacan n de ái podü vire de porsona deplü capitui de chësta »Fasa 2« che pormët deplü libertés personales y ince de mobilité y spostamënt fisich. La »Fasa 2« fira inant ince deplü aspec cheriá tla »Fasa 1«: responsabilité y respet por i atri, por se instësc, y ince: por i injins publics, les strotöres publiches, i mesi publics de trasport. Baian cun l'assessur provinzial ladin ala mobilité Daniel Alfreider díjel che la re-daurida dles libertés y di sorvisc é ma stada meso de gre en gre söla litra dla crëta danter les porsones, y danter les istituziuns publiches y i zitadins. La mobilité publica é n fatur essenzial tla vita da vigni dé de vignun che ó jí da n post al ater, mëss jí al
laur o a na vijita sanitara... Mo al é ince un de chi sorvisc che se damana dal pröm dé de re-ativaziun di orars spësc incá la partezipaziun de vigni passajier por sconé l autist y i atri passajiers te bus y ferata. Le sëns y fin da sconé i atri, dantadöt le personal, comporta dötaurela de conseguënza che i passajiers ne pó nia fá la cherta te bus. O che ai á le »Südtirol Pass« o che ai á chertes por vigni iade precumprades avisa dlafora (te nosc caje a Bornech), o che ai pó jí debann por l'anzianité... o che ai ne paia nia y vá spo a fosch incërch. Cina che n iade resultëia »fosch« por mancianza de informaziun y por nezescité podesson dí te chisc tëmps nia saurisc dl coronavirus »por l'amur de Di!«, mo canche jënt de mesa eté dij »sëgn pón jí debann cun le bus, porchël vái pa« ciáfon pel de iarina y le bunsëns zivil inzai ciamó te nosta sozieté y morala se dessëna! Sfruté sëgn les dificoltés de chisc tëmps maladoran n sorvisc publich por l'ego ne pó nia gní toleré, y al é da s'aodé che la SAD y ince i Comuns (por i minibusc y city-busc che roda ma chiló) mëtes man da controlé y fá straufunghes. Ajache al podess sozede tosc che na coriera ne pó nia plü lascé senté sö – por le numer limité de passajiers – na porsona che á davëi debojëgn. Sce mec i passajiers bele sentá jö vá spo ciamó incërch »a fosch« él bëgn n pü' scandal. Döt chësc söles sciables di atri!
(de Iaco Rigo)