La Usc di Ladins

La é stata ceta per n bel pez col semafer checen la ferata che Andrea Frigo à fat sù de legn e l’à metù te sie vidor. N stop sforzà per via de la situazion de emergenza del coronavirus ma che pian pian ades somea ge aer lascià l post a n nef viac. Che sie n bon segn ence per n’autra ferata, de dimenscions ben maores, chela che speta da egn de doventèr realtà te la valèdes de la Veisc.

Se trata de pensieres e retrac che Andrea Frigo da Sèn Jan à volù condivider con Massimo Girardi, president de Transdolomites, e che el dapò à manà a la redazion de La Usc.

Andrea l’é n gran sostegnidor de l’idea de la ferata te la valèdes de la Veisc, na sensibilità che no l tegn sconeta ma che l vel palesèr publicamenter. No l’é la pruma outa che Andrea fèsc modelins de ferates che ge va dò a chesta idea. Chel che l’à metù fora te sie vidor l’é nasciù pissan a la ferata de la vita che via per chisc meisc passé à cognù se fermèr o ferèr per via de la emergenza da Covid-19. Semafer checen che mingol a l’outa é doventà śal e dapò vert per ciapèr endò ite sie viac. N spieie del cors de la vita che tedant a la tragedies à semper sapù co pontèr via endodanef. L’augure l’é che dò ogne tragedia vegne semper na crescimonia e na maduranza de l’umanità, che ogne lezion la serve per emparèr e mudèr col jir sorafora duc i slogan e la retorica che aon scutà te la setemènes passèdes.

De più su La Usc stampèda de vender ai 22 de mé 2020.


 (mci)