La Usc di Ladins

Dò da aer let l’articol de Fernando Brunel su le piate de La Usc numer 23, olache l rejona del Stradon de Fascia e più avisa de le condizion anter Soraga e Sèn Jan, volesse portar dant la medema situazion dejastrada ence per la Val de Sora, soraldut anter Fontanac e Cianacei. Ence chiò, a part le condizion de l’asfalt che magari no l pel vegnir fat nef duc i egn, chel che sauta a l’eie l’é segur la situazion di mures enlongia stradon.

L se trata de na condizion pericolousa dantdaldut, ajache da chi mures mec desfac podessa sutar fora te ogne moment un de chi sasc, robe jà sozedude e vedude personalmenter, ma no demò, l’é ence na costion de parbuda. No pel esser che te na val turistica desche Fascia, che la vegn metuda sun duc i placac del Trentin, vegne lascià esser oramai jà da n bon trat de temp chesta sort de slegrarìa. L stradon cognessa esser l biliet da vijita de n lech, coche se se prejenta al ghest, no peisse che nesciugn abie gust de ge prejentar ai turisć cambre coi mures mec desfac o che se desgrosta.

L’é dassen da se tegnir de mal de aer certe strade, soraldut per chi che vegn da la Val d’Ega olache ti ultimes egn l’é stat fat n muion de investiments e ence dò dal rebalton de Vaia del 2018 l’é stat belebon comedà e ades, anter tunel e comedamenc, se rua belebon sorì sun Ciareja e somea de passar fora per na cort ben tegnuda e rencurada. Canche se passa te Fascia enveze se veit sobito na gran desferenza, dut lascià endò o concià ite cochemai e la part piora l’é canche se rua a Sèn Jan, olache l’é chel rondel con chi plasticogn de chi »new jersey« bienc e rosc, metui aló da egn e che proprio i ge dasc na »gran bela parbuda de efet« sibie a la Pieif de Fascia e che ai monc che l’é tedò… 


L'articol va inant su La Usc nr 25 stampèda ai 26 de jugn  (Riccardo Zanoner)