Derit de opinion

Data

25 de setember 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
EDITORIAL
Anter la desvaliva costions che à segnà chesta campagna litèla - se cogn dir perauter portèda inant con gran coreteza e respet da duc doi i candidac a Procurador - à soscedà gran marevea e comenc l'interogazion del conseier provinzièl ladin Luca Guglielmi.
Guglielmi, che l'é ence secretèr politich de la Sociazion Fassa, dò aer vedù che la presidenta de l'Union Generela di Ladins dla Dolomites Milva Mussner l'à palesà te n video sia stima per l candidat procurador Giuseppe Detomas, l se à out al President del Consei de la Provinzia Autonoma de Trent Walter Kaswalder con na interogazion a resposta scrita, domanan che l palese sia opinion sul fat che la presidenta de na socia­zion culturèla che ciapa finanziamenc publics la tol posizion politica.
De tropes i à sotrissà che esprimer na opinion politica – ti tempes per­metui e zenza ofener nesciugn – fèsc pèrt di deric metui dant da la Costituzion, e l'é da se n fèr marevea che n raprejentant istituzionèl l pertene de ge neèr chest derit a na persona demò percheche la é a cef de na sociazion culturèla. Amò de più vedù che anter i candidac de n muie de listes, ence te Fascia, l'é presidenc o esponenc de peis de sociazions che ciapa finanziamenc publics.
La presidenta Mussner aea dit sobito de no esser per nia cruzièda per chesta interogazion, ajache tel Sudtirol l'apel a sostegn de un o l'auter candidat l'é deldut normal, ence da pèrt de presidenc de socia­zions. Sociazions che te n contest democratich les ciapa i contribuc che les à l derit de ciapèr per l'atività che les porta inant e che i raprejentanc istituzionèi à l doer de tratèr e finan­zièr dutes zenza discriminazion, aldò de criteries ogetives. Chierir de ge serèr la bocia a zachei lascian entener che chest podessa aer efet sui contribuc a sia sociazion, l'é vèlch che va contra la democrazia.
A confermèr l'assurdità de chesta interogazion, chisc dis passé l'é ruà la comunicazion del President del Consei de la PAT. Kaswalder, che a livel politich l fèsc pèrt de la lista Autonomisti Popolari, che adum con Sociazion Fassa l'à sostegnù l candidat Procurador Matteo Iori, te sia encèria istituzionèla l ge à scrit a Guglielmi che sia interogazion no pel vegnir touta dant, ajache sia domana va fora da la competenzes che revèrda la Jonta provinzièla e no la corespon ai argomenc tipics de la interogazions ajache la fèsc referiment a l'atività politica de etres sogec.  (de Lucia Gross)

Galaria retrac