12 steiles te n ciel seren, cheles che se à podù mirèr endèna la prejentazion che l’Apt de Fascia à endrezà per meter al luster i atlec schiadores che la proscima sajon i corarà con i colores de la Nazionèla e de noscia val tel dos.
Anter i atlec che l’Apt de Fascia à podù prejentèr al publich l’era Stefano Gross, l’atlet con maor esperienza e che pel esser conscidrà desche l far del moviment sportif fascian, ajache l gareja per la pruma posizions mondièles oramai da n muie de egn. »Voi ge dir n gran develpai a l’Apt che me sostegn ormai da diesc egn. L’é dassen bel aer valgugn che creit semper en te, ence te le sajon più senestre e te le dificoltà« à dit l slalomist ruà 12 outes sul podie de Copa del Mond te sia spezialità. L clasc ’86 l’à metù dant ence si obietives, che i vèrda 2 sajons inant: »Te le proscime doi sajon sarà i Mondiai e le Olimpiadi... l’obietif l’é na medaa, chela me mencia. Ge vel aboncont esser consapevoi del moment, esser vertesc a dut, l’emportant ades l’é pontar via«. Mencèa enveze i autres doi atlec del schi alpin, Federico Liberatore e Monica Zanoner.
De più su La Usc 41 di 16 de otober
(Daniele Verra)