La Usc di Ladins

Tröp é bele pié ia en chësc altonn (dantadöt mostres), por l’ann 2021, canche an recordará i 700 agn dala mort de Dante Alighieri. Nia sigüsc n’é i storics söl ann che Dante é rové a Ravenna do avëi sojorné a Verona ala curt di Cangrande della Scala. A Ravenna êl gnü invié dal nobl Guido Novello da Polenta che ospitâ le poeta cun düc i miric che al s’â bele fat, y ti conzedô dötes les poscibilités da coltivé sü stüdi y da rové la "Commedia".
De Dante él da ciafé aldedaincö a Ravenna le "raiun dl Chit", olache al é ince la fossa y le monumënt dl poet, le "Quadrarco di Braccioforte", la dlijia de San Francësch y le convënt di Francescans.

Le Tru de Dante
Bele da plü agn incá él gnü asfistié y amarscé le "Tru de Dante" danter süa Firenze y Ravenna (infos sot a camminodante.com).
Le Tru de Dante tol ite n percurs escurscionistich y ince cultural, storich y spiritual. La spana de tëmpl ideala por fá chësc tru é ma – otober. Le tru tol ite 370 – 380 km, val’ toch pó ince gní arlungé cun variantes. Diesc é les tapes por jí da Ravenna a Firenze y önesc chëres aconsiades da Firenze derevers a Ravenna. Ma te n pice toch vá i dui trus adöm.

Söl retrat:
Mural dl "artist de strada" Kobra a Ravenna.

 (Iaco Rigo)