La Usc di Ladins

Rua 4 ponc per l Fascia Balon chesta setemana, ajache en mercol i ladins à venciù fora de ciasa contra l Porfido Albian e en domenia i à pareja al Cotura contra l’Alta Valsugana. 

En mercol sera l é stat na partida n muie combatuda, ma a la fin l é stat i bec de mister Cigolla a aer la soramessa. Trottner e compagnes i é stac bogn de rebaltar l resultat con i goi de Patrizio Deville e Matteo Bernard. 

En domenia enveze l é ruà te Fascia la seconda en classifica, l’Alta Valsugana. Ti prumes menuc part miec i joegn fascegn che do doi menuc i passa en vantac con Samuele Ruggiero, che l desfruta n fal del portier ghest che ge passa l balon: l clasc 2002 da Moena no se fasc prear e l lo met te sach. 

Col passar di menuc i ladins ge lascia l ciamp ai valsuganoc, che i risćia de parejara la endesfida, ma la trata da cet vegn parada dal joen clasc 2006 da Cianacei Francesco Brunner, a soa pruma partida da titolar.

De più, con classifica e resultac de la squadres mendres, su La Usc stampèda de en vender ai 19 de oril.  (Pierpaolo Rasom)