La Usc di Ladins

‘Genuis – Leonardo da Vinci anter Èrt e Scienza’ l é la neva mostra dedichèda al cognosciù genio universèl che verc doman, jebia ai 13 de mèrz, ti spazies espositives del Liceo Artistich de Sèn Jan. L percors espositif, dut ideà e realisà dai studenc de la clasc terzes di licees scientifich e de la èrts feguratives, très ativitèdes e labratories, conta di enteresc de Leonardo scienziat, artist e enjegner.

L alestiment moscia i studies de da Vinci su la sezion aurea che se pel enrescir te sia operes desche la Gioconda e L’ultima cena e ti ‘ludi leonardeschi’. Curiousa la sezion del percors espositif dedichèda ai ‘nodi’,  pascion de Leonardo, leèda a sia reijes: Vinci, dal latin vincius (grop) l era defat n cianton cognosciù olache stajea i entreciadores de cesć e autres ogec. Enteressanc ence i exhibit ideé dai studenc del Liceo Artistich che va a fon sun temes che revèrda la prospetiva aerea e la fisiognomica, l studie di trac del mus e de la emozions che i lascia veder.

Ma la pèrt più enteressanta l é la 13 reproduzions de la machines de Leonardo, ruèdes te Fascia de gra a la colaborazion anter la Scola Ladina e la Roggia de Vigevano, olache da egn l é esperc e pascioné che se dèsc ju per realisèr i projec mecanics de Leonardo descheche i vegn descric te si sacotenc codesc. De gran emportanza, per la realisazion de la mostra ‘Genius’ l é stat l lurier di studenc e di dozenc e tecnics che via per l an de scola se à dat ju te la projetazion e la realisazion di materièi metui fora. Da no desmentièr la colaborazion preziousa con la Coprativa sozièla Inout che verjarà la mostra te la scoles populères de Vich via per chest istà, e l sostegn de la Fondazion Caritro. L’inaugurazion de la mostra é doman, jebia ai 13 de mèrz, da les 16:00 te la sala espositiva del Liceo Artistich a Sèn Jan. La restarà averta enscin a jebia ai 3 de oril, da veder su prenotazion al numer de fonin 349 6491192 o a la mail thomas.zulian@gmail.com