La Usc di Ladins

I sorvisc dla »Südtiroler Krebshilfe«
Le Raiun Sozial Val Badia en colaboraziun cun la Südtiroler Krebshilfe pîta na portina de informaziuns por dé suport, consulënza y informaziuns ütles a chi che nen á debojëgn
Chësc sorvisc é ponsé por vignun che oress ciafé informaziuns sön les ofertes dla Südtiroler Krebs­hilfe, sciöche contribuc por cum­pré parüches, portapiec (BHs) y costüms, sostëgn finanziar por chi che afrontëia dificoltés econo­miches a gauja dla maratia, ativité fisica sciöche ginastica y acqua­gym, grups de autoaiüt, oportu­nités de tëmp lëde, drenaje lin­fatich, sojornanzes al mer y sö por munt, ativités de informaziuns y assistënza psico–oncologica.
Por n termin o de plü informa­ziuns cherdede sö le 348 0075284, dal lönesc al mercui dales 8:30 ales 12:00.

Gnide al Carlascé d’Al Plan
Döta la jënt – cun o zënza maschera – é bel inviada da gní ala defilada por la festa plü matorina dl ann. An s’incunta en mertesc ai 4 de merz a Al Plan
En mertesc ai 4 de merz vëgnel indô fat le Carlascé d’Al Plan. La Cooperativa Turistica Al Plan/San Martin inviëia döta la jënt da gní alerch y sambëgn ince da fá para pro la gran de­filada, che pëia ia dales 14:00 tla plaza dan la Coo­perativa Turistica (ex no­dadoia curida) y che rovará fina pro paiun de paisc.
Iló gnarál spo pre­mié les mascores plü ori­ginales crea­tives. Les iscri­ziuns ala defila­da vëgn tutes sö en chël de dales 13:15 inant, dan l’ofize turistich.

Curs de telemark a La Ila
La US La Ila mët a jí n curs por prinzipianc y progredis: trëi sëres de merz, sön la pista »Doninz« a La Ila
La Uniun Sport La Ila – se­ziun telemark, mët a jí n curs de telemark por prin­zipianc y progredis.
Tó pert po düc chi che á in­teres da vaghé les prö­mes otes te chësc sport. Le pröm iade vëgn le curs tigní en mer­­cui ai 5 de merz dales 20:00 ales 22:00, sön la pista »Doninz« a La Ila. Le cost é de 60,00€ (20,00€ vá sciöche iscriziun al’Uni­un Sport La Ila). Les iscri­ziuns vëgn tutes sö pro Arthur al 329 8627658 – ma tres WhatsApp.

»Ëiles, let’s rock«
N ucajion dl Di dl’Ëila mët l Tublà da Nives a jì na sëira dedicheda ala ciantarines
y musizistes de Gherdëina, n sada ai 8 de merz dala 20:00
L cianta y sona: Carmen y Marion Insam, Jenni Perathoner, De Cater, Nadia y Natalie Moroder, Erika Mussner y Judith Piccolruaz. Danterite liejerà dant la scritëura Nadia Rungger.
La lia »Tublà da Nives« nvieia duc y dutes a festejé l »Di dl’Ëila« n iede autra­mënter, cun la forza dla mujiga al feminil.
Chertes danora pòssen apusté tres WhatsApp al numer de telefonn 333 7166471.

Iscrizions Scola de Mujiga de Gherdëina
La Scola de Mujiga fej al savëi che l’iscrizions per l ann 2025/26 puderà unì fates online dai 1. nchin ai 31 de merz sun my.civis.bz.it
Coche uni ann puderàn crì ora danter de plu strumënc, cianté, muvimënt y bal. L’ëures che vën pitedes sibe te Sëlva che nce a Ur­tijëi ie: Educazion mujighela dai 5 ani insù; Cianté - Muvimënt - Rujené per la prima y segonda tlasses dla elementera; Furmazion dla usc per jëuni:es y granc dai 11 ani insù.
I strumënc:
Dai 6 ani insù: fagot, vidula, celo, zitra. Dai 7 ani insù: armonica a butons, corn, flaut a bech, tlarinet, tumbrëta y flicorn. Dai 8 ani insù: chitara, flaut traviers, percuscions, posauna, corn tenor, saxofonn, tlavier. Dai 9 ani insù: tuba, oboe.
A Urtijëi: »Sing & Swing«, per sculeies dla 3a, 4a y 5a tlas dla scola elementera;
»Sing your Song«, per sculeies dla trëi tlasses dla scola mesana; »Lausbubenchor«, per mutons dala 3a tlas dla scola ele­men­tera nchin ala 1a tlas dla scola mesana.
Te Sëlva: Cor »La Derjola«, per scule­ies dla 3a, 4a y 5a tlas dla scola ele­mentera y dla trëi tlasses dla scola mesana.
Ai scric ite nue­ves ti uniràl fat al sa­vëi al plu tert n­­chin ala fin de lugio sce i à giapà lerch.
Per nfurmazions plu avisa: 0471 796858.