La Usc di Ladins

Te la piata di joegn, chesta setemana aon volù ge far dotrei domane a Gabriele Cloch, joen fascian che dal an passà l laora desche tecnich a la firma Technoalpin de Busan. L se cruzia de machine che fasc neif che à inom Snow Factory e l va stroz per dut l mondo a le meter ensema e a le conciar.

Gabriele, contene mingol chi che tu es…
Son da Poza e é 22 egn. É studià al Liceo scientifich de la Scola Ladina de Fascia e do la matura son jit a far n cors de doi egn a Rorei tel Polo de la Meccatronica. Al post de l’Università é preferì far chest percors ajache son semper stat un che ge sà bel far, fogar, meter le man piutost che star massa sui libres. De gra al cors é podù sobito meter en pratega chel che emparae e far n tirocinie te na firma emportanta desche la Technoalpin. A la dir dreta aee domanà de poder jir a lurar a la Prinoth, olache i fasc giac de la neif, ma te chel moment no i aea besegn e no i me à tout. E coscì son ruà jun Busan, olache é fat desferenc stage anter l 2022 e l 2023. De jené del 2024 la Technoalpin la me à domanà sobito de jir a lurar per ic.

De più su La Usc stampèda de en vender ai 28 de firé.  (Thomas Zulian)