La Usc di Ladins

L é stat n bel confront anter ladins, chel che enstadì à vedù desche protagonisć Heinrich Videsott, Intendent nef de la Scoles ladines del Súdtirol, André Comploi diretor del Departiment Istruzion e Cultura ladina de la Provinzia de Busan e Carlo Suani, secretèr del vizepresident del Consei regionèl Daniel Alfreider.

La delegazion ladina de la Provinzia de Busan é ruèda te Fascia en vender ai 21 de firé e la é jita a cognoscer i referenc de la Scola Ladina e chi del Consei de l’Union di Ladins de valèda.
Te la Sorastanza de la Scola Ladina Videsott, Comploi e Suani i à podù cognoscer l Sorastant Federico Corradini, sie vicarie Domenico Bravi, la referentes Tatiana Soraperra per la scolines e Renata Rasom per la populères e l responsabol del OLFED, l Ofize Ladin de Formazion e Enrescida Didatica, Alessandro Margoni.
La delegazion se à dapò spostà pech dalonc, semper a Sèn Jan, te la Ciasa de la Moniaria olache da nience n an l’Union di Ladins de Fascia à tramudà sia senta e la Redazion de La Usc di Ladins.
A i spetèr l era l president Fernando Brunel, l president onorarie Antone Pollam, i conseieres Fabio Chiocchetti, Franco Ghetta, Lucia Gross e la diretora Nives Iori. Comploi à palesà sia legreza de poder scontrèr i componenc ‘storics’ de l’Union de Fascia, che te na scontrèda averta e informala i à podù rejonèr coi trei funzionaries ladins de la Provinzia de Busan de colaborazion anter istituzions e de n muie de auter.

De più su La Usc stampèda de en vender ai 28 de firé.  (Lucia Gross)