La Usc di Ladins

Anter sia desvaliva ativitèdes l Comitat de la Crousc Checena  de Fascia e Fiem l é do a portèr inant na azion per arvejinèr i joegn e duta la comunanza al Moviment de la CRI. Per chest dai 13 de mèrz ai 18 de oril te la senta de la Crousc Checena de Ciavaleis vegnarà metù a jir n cors con lezions sul prum aiut e doura del defibrilador, sul Derit internazionèl umanitarie e la storia de la CRI e su l’ativitèdes che vegn portà inant e l ruol che pel aer i volontadives, de vigni età dai 14 egn en su.

Per portèr dant duta la informazions e prejentèr avisa i contegnui del cors vegn metù a jir trei scontrèdes, la pruma sarà te la senta de Vich, te Piaz Massar 7, en jebia ai 6 de mèrz da les 20:30; la seconda l dì do, en vender ai 7, da la medema ora te la senta de Moena te Strada Löwy 86 e la terza en lunesc ai 10 de mèrz fora Ciavaleis, via Sorelle Sighel 22, semper da les 20:30.   

La scontrèdes é avertes a duc, per aer maor informazions se pel tor contat, ence con messaje whatsapp, al numer 348 9318354 o manèr na mail a fassafiemme.formazione@trentino.cri.it.

L president del Comitat de Fascia e Fiem de la Crousc Checena, Francesco Sommavilla, l envia dutes e duc a se fèr inant.

 (LG)