La Usc di Ladins

Pudësses’a te prejenté n curt?
Bon di a duc, son David Rung­galdier, é 27 ani y son de Sëlva. É finà da puech de studië Iapa­nologia a Minca y de mei jirei tl Iapan a lauré coche mëinaturisć.

Cie te à pa ispirà a studië Iapanologia?
Bele da for incà éi abù n gran nters per i »Mangas«, comics iapanejes, y »Anime«, animazions televijives iapanejes. Tres chisc ie mi nteres per l Iapan chersciù y canche na cumpania me ova fat al savëi dla puscibltà de studië Iapanologia me ovi scrit ite tl stude ala LMU de Minca.

Co ie pa struturà l stude de Iapanologia y cie mpéren pa?
Tl scumenciamënt iel l plu mpur­tant mparé la rujeneda. N la adrova per studië i libri y l mate­rial scientifich per pudëi lauré daldò coche iapanologh y se dé ju cun funtanes scientifiches y storiches dla Iapanologia. N mpera nce la storia y la cultura dl Iapan y n à nce la puscibltà de se dé ju cun l aspet modern dl Stat, mparan truep dla politica y dl’economia. Ie persunalmënter é metù l focus de mi stude sun la cultura, l’usanzes y la religion, che tl Iapan ie l budism y l shin­toism. La lezions dl stude de Iapanologia vën tenides sibe per tudësch che per iapanesc. (Sara Senoner)