La Usc di Ladins

L é vegnù fora la informazions su la proes de ejam de ladin te Fascia, che vegn endrezé dal Comun General. La presidenta de la Comiscion de ejam, d.ra Evelyn Bortolotti, fèsc a saer che la pruma sescion ordenèra del 2025 de zertament de la cognoscenza del lengaz e de la cultura ladina vegnarà metuda a jir via per l meis de mé. Tel avis vegn recordà che la domanes pel vegnir manèdes ite dut l an e i candidac pel se scriver ite a vigni livel, colun che sie l titol de studie che i à, ma i cogn aer compì i 17 egn al moment de la enscinuazion. Chi che no à amò manà ite la domana, per poder tor pèrt a chesta sescion i cogn la manèr ite dant da les 12.00 de en jebia ai 10 de oril 2025. La domanes che rua do chest termin les vegnarà tegnudes bones per la pruma sescion utola che vegnarà do.
La domana de enscinuazion la pel esser consegnèda a man al ofize di Servijes Linguistics e Culturèi del CGF a Sèn Jan te Ciasa de la Moniaria (Strada de la Pieif 1) o manèda per posta racomanèda con avis de rezepis (vèl la data del stempel del ofize de la posta), o amò da posta eletronica zertifichèda a la direzion pec.cgf@pec.comungeneraldefascia.tn.it

Sul sit web www.comungeneraldefascia.tn.it te la sezion di ejames de zertament se pel troèr e desćiarièr i formulères per la domana e duta la indicazions che serf.
I dis e i oraries di ejames di desvalives livie i vegnarà publiché dant che sie fora i 22 de oril sul sit del Comun General de Fascia, sul albo telematich, sui sic e sui albi di Comuns de Fascia e la publicazion vegn conscidrèda desche convocazion di candidac.
Per informazions se pel se oujer ai Servijes Linguistics e Culturèi del Comun General de Fascia ence per telefon al numer 0462.764500 – int. 4 o per e-mail a cultura@cgf.tn.it.

 (LG)