La Usc di Ladins

Rua endodanef i 3 ponc per l Fascia Balon de gra a la venta contra la Vigolana. Ti prumes menuc l é l ciamp che à la miec. Al 13’ rua l prum gol fascian con Alessandro Crepaz che desfruta n fal del defensor ghest e l met l balon te sach. Do l gol fascian l é i valsuganoc che taca a ciapar semper più ciamp e a mez del temp i é bogn de parejar con na trata che vegn desviada e la rua te usc. Sobito do rua n’autra ocajion per i ghesć ma Simone Rasom de Rajum l é bon de parar. Ti secondi carantacinch menuc l é i ghesć che taca miec fajan jech ma zenza ge dar cruzies a Trottner e compagnes. Col jir di menuc i bec de mister Cigolla ciapa te man la partida e al 70’ rua l secondo gol fascian con na bela azion de squadra che Patrizio Deville Bronza met te sach su assist de Matteo Lorenz de Jan. Passa 5 menuc e rua l terzo gol fascian con n’autra bela azion, l balon rua ti pie de Michele Petrone del Pat che met l balon te mez a l’area de rigor olache l é Michele Zulian del Lilo che da doi pasc met te sach.
Ti ultimes menuc no sozet più nia. Na bela venta, enceben no bela dal pont de veduda del jech, che serf tant per l moral che per la classifica.

En domenia i bec de president Ghetta proarà a portar a ombria de Sas da le doudesc endò i 3 ponc te na partida contra l Porfido Albiano a Albiano da le 3 domesdì.

 (Pierpaolo Rasom)