La Usc di Ladins

»Aon besogn de volontadives de dute le età ajache te chisc egn se à smaorà semper de più i servijes soziai che perveit l trasport da man de la CRI e donca ence jent che va en penscion, che à estro de se meter a la leta per dar na man. E dapò volessane tirar int i jovegn, volon investir su le neve generazion percheche aon de besogn de jent che ne deide a scuerjer duc i setores, da l’ambulanza, a la protezion zivila, ai desvalives intervenc.«

Coscita ne à dit l president de la Crousc Checena de Fascia e Fiem Francesco Sommavilla che aon sentù per ge domanèr coche les é jites la scontrèdes de prejentazion del nef cors per volontadives. »L é stat endrezà trei scontrade: ai 6 de marz a Vich, ai 7 a Moena e ai 10 a Ciavaleis, en dut à tot part 25/30 persone, son content, speron che le vae inavant. L cors l é tacà int ai 13 de marz ma chi che volessa amò tor part pel vegnir a la seconda scontrada che sarà ai 18 de marz, se jirà inavant fin ai 18 de oril. L prim cors l serf per jir ite te la CRI, l é n cors de basa, dapò se averc na lingia de percorsc per jir inant, da chi più sorii a chi più senestres per deventar autisć de ambulanza. Ogne an meton a jir n cors percheche l ent publich domana semper più servijes, soraldut per la jent de età, per chi che é da soi a ciasa, per i portar ti zentres de enconter o te le Ciase de Paussa de Fascia e Fiem. Sun Fiem aon investì trop te chisc ultimes egn e assane besogn de crescer e de smaorar i volontadives. Più se é e più se é bogn de dar n servije a do a do, no demò per n curt temp canche se pol, ma con le garanzie de l far fora per fora.«

De più su La Usc de en vender ai 14 de mèrz del 2025  (Monica Cigolla)