La Usc di Ladins

Pederü é n post soront, podesson miné. A 12 km dal paisc d’Al Plan él sonté etensom la val de Mareo, "olache la strada se röa y olache al mët man la munt", mo gnessel da dí. D’invern él plü chît. Al röa ete la pista de paslunch, an pó pormez con l’auto, trepa jont pëia ia por jí sö alalt coles pels, coles ciaspes, a pe. Dal 2009 encá fej ince Pederü pert dal teritore dles Dolomites patrimone UNESCO. Na merscia co á stramüdé le turism. "Dijun che ta Pederü ánse albü en invern normal. Nos laurun d’invern plütosc con jont co fej paslunch, co vá sö por munt coles pels, coles ciaspes o ince a pe. Baldi, desche al é sté n pü’ sora dötes les Alpes, él tomé pücia nëi eniann. Coles pels jêra da fá en pü’ de val’, mo les condiziuns n’ea nia dër ideales. Chë sort de ghest á porchël en pü’ mancé", dij l’ostí dl alberch da Pederü Walter Pisching, ch’i un incunté por damané n bilanz sön la sajun da d’invern, mo suradöt ince por ti damané co che al é d’isté y co che la merscia UNESCO á müdé le turism. "Al s’á müdé daldöt. Da n turism de taliagn y todësc, él gnü en turism da döt le monn.", dij ennant Pisching. 

La intervista che i ti án fat, olache i án baié danter l’ater dal gran aflus de jont, dles prenotaziuns co vën belo en ann danfora, dal daz ete por la val y dal bel da jí tla natöra, podëise lí t’La Usc di Ladins dai 14 de merz  (Intervista: Pablo Palfrader)