La Usc di Ladins

L é sun usc la XXVIII edizion de la Scufoneda, l maor event de agregazion per i pascioné de telemark de duta Europa, da anché vender ai 14 de mèrz fin en domenia ai 16, per endrez di Scufons del Cogo. Se à scrit ite 400 schiadores e la gaissa e l entusiasm per chesta neva edizion, dal titol »N mont de colores« é dalbon gregn. I portoes de Lujia e Sèn Pelegrin é vertesc per ge lascèr lèrga ai telemarker e freerider che vel viver ensema chesta straordenèra tecnica col ciucegn ledech.

L é stat endrezà ence l Vilaje Scufons sun Sèn Pelegrin olache sabeda e domenia se podarà veder e proèr duc i materièi de la maor firmes del setor. Ence chest an i schiadores à l met de fèr raides, escurscions coi schi da telemark, promenades con la cèspes e tor pèrt a na lingia de evenc da cornisc desche la festes après-ski e i momenc de agregazion ti locai de Moena con musega, bai e legreza. N aspet che fèsc doventèr la Scufoneda n event unich l é che la é averta a duc, con l met de proèr e se miorèr tel telemark de gra a la colaborazion de la Scola de schi Moena Dolomiti per chi che vel se arvejinèr a chest sport e ence di istrutores nazionèi CO.SCU.MA per i schiadores più esperc. Felice Canclini El Vecio, president di Scufons, à arsegurà che sarà lèrga per duc e devertiment, sport e atività a l’averta de duta la sorts.

 (MCI)