La Usc di Ladins

Doman, vender ai 4 de dezember l’é Sènta Bèrbola, la patrona di Studafech. Chest an la situazion sanitèra da Covid no permet ocajions de enconter e de festa e coscita la Federazion di Studafech volontères del Trentin l’à dezidù de festejèr a na vida desvaliva. 

Su proponeta ence del nef president Giancarlo Pederiva doman, da les 12.00, la sirenes de paìsc e de duc i mesi de socors di 237 gropes de Studafech del Trentin sonarà ensema per 30 seconc en segn de union e de vejinanza anter duc i volontères e de speranza per i meisc che vegn. 

Chest an per i beleche 8 mile Studafech volontères del Trentin no sarà na festa desche cheles di etres egn, no i podarà se binèr per la radunanza e nience per n moment convivial. Tant l’aisciuda passèda che via per chisc meisc da d’uton i Studafech é semper stac en pruma linea per portèr sie didament te chesta situazion sanitèra de emergenza.

Doman, dal mesdì donca, canche sentiron sonèr la sirenes, no aron da se sperder ma se strenjaron simbolicamenter apede ai volontères che vel coscita manèr fora a duc chenc n segnèl de fiduzia tel davegnir.  (MCI)