La Usc di Ladins

Anché, sabeda ai 16 de jené del 2021, l’é vegnù fora l’ultima edizion de papier del sfoi »Trentino«. Con doman no se l troarà più te la boteighes di sfoes. 

»Aldò de la grieva crisa del setor de l’editorìa, en particolèr chel di sfoes de papier, te na situazion de pandemìa che no somea zeder, la S.I.E. SpA fèsc a saer de cogner serèr sù, dò 75 egn de prejenza sul teritorie, l sfoi da duc i dis »Trentino« per via che no l’é più sostegnibol economicamenter.«

Chest l comunicat dat fora angern, vender ai 15 de jené, da la sozietà editora, l grop Athesia de la familia Ebner, che l’é la medema di sfoes »Alto Adige« e »l’Adige«.

La verscion digitèla www.giornaletrentino.it restarà ativa e la vegnarà smaorèda per mantegnir vif l marchie e per poder, amancol en pèrt, seghitèr a ge dèr lurier ai 19 giornalisć de la redazions de Trent, Roveredo e Riva del Garda che é stac metui duc en cassa integrazion. 

Na neva slarièda fora de n bel seren che à lascià duc destrametui. Se sera sù na storia editorièla che à vedù te chest sfoi n ator fondamentèl per la formazion de l’opinion publica, ascort osservator ogne dì de la cronaca nazionèla, trentina e de la valèdes de gra a giornalisć, redatores, corespondenc, fotografs che à metù a la leta profescionalità, empegn, cher e lealtà.

No l’é n moment sorì per i sfoes de papier che cogn se la fèr cà dì per dì con la gran concorenza del digitèl ma nesciugn se aessa pissà che la sozietà editora rue a tor na dezijion coscita grieva per dut l mond de l’informazion.  

N muie i messajes de vejinanza e de stima de la istituzions trentines. »Serèr sù n sfoi fèsc doventèr più pureta duta na comunanza« à dit l president de la Provinzia de Trent Fugatti.

Perder n sfoi vel dir dir perder na pèrt de pluralism de idees, de cognoscenzes, de opinions e de democrazìa. 

Ence nos de la redazion de La Usc di Ladins ge sporjon ai coleghes giornalisć del sfoi »Trentino« duta noscia vejinanza.  (Monica Cigolla)