La Usc di Ladins

La desgrazia dl Vajont, suzeduda dan 60 ani, ti va mo al didancuei dassënn a cuer a truepa persones.
L ie na desgrazia che ne fej nia mé pert dla storia de n luech o de na provinzia, ma de dut l mond.
L ie una de chëla ntraunides che lascia na gran ferida tl’ana universela, na plea che lecorda i gran fai che l’umanità fej canche la venerea l „Die scioldo“ zënza respeté l popul, la natura y i dërc de duta la formes de vita de nosc planet.
La ferida lasceda da chësta desgrazia fej mo for mel, n dulëur vif te nëus duc. La ti tën bel avisa dant l spiedl a nosta sozietà, che à bën tan de gran ambizions y uel tré adalerch mo plu scioldi, mo plu richëza materiela, ti dijan de sci a d’uni sort de proiec y manifestazions che ne porta nia auter che na gran desdruzion. Juesc olimpics o i mondiei purterà scioldi a puec, l priesc messerà paië la jënt… n priesc massa aut!
Per scioldi vën for inant zapei ju i dërc dl popul y derubedes la ressorses dla natura che ie de duc i vivënc, ntussian l’ega, la tiera y l’aria. Chësc suzed a livel globel. I seniai che la natura nes manda devënta for plu tleres – avisa coche dan 60 ani dal Vajont, ulache l fova da sentì i zitramënc dla tiera ufenduda, da udëi la gran sfëntes che se giauriva su per l Mont de Toc... Y l ne univa fat net nia! Sce jënt se lamentova o damandova do, univa l problem smendrì o scutà via. „Nëus on dut sot a cuntrol,“ unìvel dit cun gran aruganza. Net nia ne daussova mëter n pericul l proiet di granc, l prufit. Na jurnalista da snait che se nfidova a dì l’aurità ie unida data sëura, ujes critiches ova da scuté.
Canche la smueia ie pieda via, fòvel massa tert. La ie sbrisceda ju tl lech cun na viulënza che deguni ne se ëssa mei nmaginà, mort y dulëur che n ne ie nia boni de descrì fova la cunseguënzes.
Perchël iel gran ëura che cialon sun nosc bosc, nosc crëps, nosta natura, che ie n dut un cun nëus. Scuton su la meludia che vën da si ana, che nes avertësc cun na usc n iede fina y da maniera, ma che pudëssa deventé n urdl da temëi!
Y dantaldut: speron che la smueia ne sibe mo nia mueta!

Michela Piazza, Urtijëi