La Usc di Ladins

La sala Simonin Maza de le scole de Moena se à empienì de jent en sabeda ai 20 de oril. No demò moenac, ma persone ruade ence da Fascia o da più dalonc, spente dal benvoler e da la stima per Elio Croce, l fra miscionarie combonian che l é restà tel cher de duc chi che lo à cognosciù.

L’era dalbon na persona speziala, n ‘bon samaritan’ l’à dit la vizeombolta Cristina Donei te sie salut al scomenz de la scontrada, che Moena é stolza de aer abù desche sie sentadin.

L’ocajion per l recordar l é stat la prejentazion de n liber che à per titol apontin »Elio Croce fratello missionario comboniano« scrit da Filippo Ciantia, n medico che l à vivù per trent’egn te l’Uganda con sia familia e che l à cognosciù dalvers fra Elio.

Ciantia l à volù far cognoscer la vita e portar inant la testimonianza che chest gran om, nasciù a Moena del 1946, l ne à lascià più col ejempie che con le parole. L lo à fat – coche à dit l autor enstes do la introduzion de Luigi Pellegrini, nez del miscionarie combonian – percheche fra Elio l aessa volù scriver de soa vocazion, ma no l à abù l temp.

De più su La Usc stampèda de en vender ai 26 de oril.  (Lucia Gross)