La Usc di Ladins

Bondì Daniela, co te prejentásseto a zachei che no te cugnësc?
Mi son la Daniela, son nasciuda del 1958 e son l linesc de Chi de Cleto, l’ultima de undesc fradiei. Mia mere l eva la Ana »noera« da Salejei nasciuda ntel 1912 e mio pere l Cleto de Chi de Ba­stián, dël l eva del 1908: nosta cesa l’eva sun Paluacia, sunsom Reba, sot Jorc.
Son juda a scola a Reba e le me­sane i è fate a La Plié, via la Villa Roma: po è ncora fat doi agn de scola todëscia a Bolsán, a la Haushaltungsschule. Ilò l é sté chero bel, se mparáva a cujiné, a cujì, a fè maia e autri laour e nplu se jiva a scola... zerto che col todësch fajëve npuò fadia, percieche savëve demè chël tánt che n’ava nsigné don Roberto Dimai. Davò avei fenì la scola, son tournada nta Fodom, del 1982 m’è maridé e son juda a sté via Liviné ulache vive ncora aldidancuoi.

Co ela stada a crësce nte na fameia con undesc fioi?
L é da dì che ntra mi e la Ilda, mia sorela plu vegla, l é 22 agn, spo mie sorele plu grane le m’à fat se pò dì da mere... no n’è de gran ricordi con mie sorele ajache co mi sonva tosata, dële i eva bele demez. Zerto che no s’ava gran preteje: no s’ava grán fora che l essenzial... ence se nte mia fameia degugn à mei patì la fam! Sè che cánche s’ava debujen de medejine o de auter, on tres bù e ciapé chël che onva debujen. (Ntervista de Denni Dorigo)