La Usc di Ladins

L verzon Eden
L Circolo – Lia Mostra d’Ert nvieia ala mostra »Garden of Eden« de Maylis Paris y Lauréane Guerin: la giaurida sarà n vënderdi ai 13 de setëmber dala ot da sëira tl self dla mostres dla Lia Mostra d’Ert
Maylis Paris y Lauréane Guerin, doi artistes visives y bele giut cumpanies, ti va permez deberieda ala tematica emblematica dl verzon Eden. Tramedoves à studià l corp dla persona y si pruspetives estetiches ie unides plu riches tres l amor per l culëur y per i materiai. De­berieda féjeles udëi si vijion y vocazion. Scebën che les rejona rujenedes desfrëntes, nasc si pascion dala medema sustanza. La mostra »Garden of Eden« ie n svilup dla tematica dl’età dl or, canche – aldò de truepa tradizions antiches – ëi y ëiles vivova te n bel verzon n armonia cun la natura...
La mostra resterà davierta nchin ai 4 de utober, dal merdi nchin la dumënia dala 16:00-19:00, de sada y dumënia sëuraprò nce dala 10:00-12:00. De lunesc iel stlut.

»Fitnesslandia«
La US La Ila mët ince a jí chësc altonn n program rich de ativités
»Fitnesslandia« se tlama le program dla US La Ila, cun cursc desvalies te palestra y tla nodadoia comunala da La Ila. I cursc vëgn tignis danter otober y novëmber, adöm ai istru­turs fitness dla US La Ila. Pité vëgnel acquafitness, nodé por mi­tuns dla scolina y elementara, pilates, meditaziun – mindfulness, cross training HIIT, karate sportif por la elementara, autodefenüda personala por mitans y mitus dla mesana, dles scores altes y adulc, tai chi, nodé y ginastica por por­sones cun dejabilité.
Por informaziuns plü menüdes y iscriziuns él da jí sön www.uslaila.it y por assistënza ales iscriziuns pón scrí a fitness@uslaila.it

Curs de yoga
A Badia n curs cun Gabriel Prada, dai 10 de setëmber ai 29 d’otober, por indöt 8 incuntades
Le yoga é na disciplina nasciüda dan da milesc de agn tl’India. Sëgn é le yoga ince tres plü conesciü chiló nos, giulan al benefize fisich y mental che al pó porté. Le yoga dëida por ejëmpl te situaziuns de stres y tëma, renforza l’autostima, dëida por la conzentraziun y la produtivité, arfera l’invedlamënt, miorëia la flessibilité y l’elastizité.
Le Consëi de Formaziun Badia organisëia n curs cun Gabriel Prada, te palestra dla scora elementara de Badia. Al mët man en mertesc ai 10 de setëmber y vá inant por indöt 8 iadi cina ai 29 de otober, tres dales 20:00 ales 21:30. Iscriziuns al numer 347 5877635.

»Sëra«, mostra d’ert
Artistes y artisć mëmbri dl Circolo-Lia mostra d’ert mët fora sü laurs tl Istitut Ladin a San Martin de Tor. Vernissaja cun performance indoman da sëra
Na schira de artistes y artisć é por otedé alalun­gia a San Martin de Tor tl laboratore dl Istitut Ladin por se dé jö, se lascé ispiré y cherié laurs söl monn sugestif y la magia dla sëra.
Por indoman sabeda ai 7 de setëmber dales 18:00 él spo preodü la daurida dla mostra di laurs che restará daverta por otedé dales 10:00 ales 12:00 y dales 15:00 ales 18:00.

Momënc magics tla natöra intata
Proieziun de fotografies de Reinhard Arnold a San Martin de Tor tl Istitut Ladin
Sön invit dl Fotoclub Val Badia gnaral en jöbia ai 12 de setëmber 2024 dales 20:30 tl Salf dl Istitut La­din a San Martin de Tor le fotograf Reinhard Ar­nold a proieté fotografies de tiers, ciüfs y contrades.
Le fotograf fej pert dla uni­un Strix (fotonaturalisć dl Südtirol).

I jüc de Gherdëna
»100 anni e 1 di giocattoli della Val Gardena« é le liber che vëgn presenté ai 13 de setëmber tl Museum Ladin a San Martin
En vëndres, ai 13 de setëmber, vëgnel presenté dales 17:00 tl Museum Ladin Ciastel de Tor le liber »100 anni e 1 di giocattoli della Val Gardena. Conversazioni con Michaela Sotriffer«, de Monica Ferrari (Ciasa edituria: Scholé 2023). Al baia Annemarie Augschöll, Monica Ferrari y Michaela Sotriffer. La relaziun gnará tignida por ladin, todësch y talian. L’entrada é debann.