La Usc di Ladins

Ti ultimes egn l marcià di ‘fic per tempes curc’ l à vedù n smaorament desmesurà, soraldut do l Covid. Chest à portà a na maor evajion fiscala e al crescer de atività che no ge va do a la normatives, soraldut per che che vèrda la segureza o la netijia. Amò apede la costion di ‘fic per tempes curc’ é stata tirèda ite te la discuscion su la mencianza de pruma cèses per families e lurieranc. Proprio te Consei de la Provinzia de Trent, en Seconda Comiscion, l é stat prejentà enstadì doi dessegnes de lege che domana che vegne smaorà la tassa de sojornanza per i cartieres e che ge n vegne dat na pèrt ai comuns che aessa l obligh de durèr chesta ressorses per fèr maor control sul respet de la normes per i fic per tempes curc.
Endèna, per garantir maor trasparenza e ge dèr de contra a l’evajion fiscala, col prum de setember l é jit en doura na neva lege a livel nazionèl che met su l codesc CIN (codesc identificatif nazionèl) per i fic per tempes curc, n sistem de regolamentazion che obliga duc i patrons de frabicac a se registrèr tel portal telematich gestì dal Minister del Turism. La sociazion fitacartieres de Fascia tegn informé si sozi.

De più su La Usc stampèda de en vender ai 13 de setember.  (Monica Cigolla)