La Usc di Ladins

L assessor regionèl a la mendranzes linguistiches Luca Guglielmi à tout pèrt en mercol ai 11 de dezember te la sala polifunzionèla del Consei di Ministres a la XXI Giornèda Internazionèla de la Mont »Soluzions per la mont per n davegnir sostegnibol: inovazion, adatament, joegn e no demò« endrezèda dal Minister per i Afares regionèi e la Autonomies Roberto Calderoli.

N event che à volù meter l’atenzion sui temes che revèrda la mont che raprejenta n patrimonie unich ma che la cogn ge fèr front a endesfides emportantes desche l mudament climatich, l spopolament e l besegn de servijes essenzièi.

»Anché sion chiò per recognoscer l valor del dessegn de lege su la valorisazion di lesc da mont aproà tel Senat che defen la mendranzes linguistiches storiches – à dit l assessor Luca Guglielmi a la fin del event – chesta neva norma recognosc l valor del lurier de la persones che à dezidù de viver sa mont, la defen l stravardament del teritorie, con mesures concretes per la crescimonia economica e sozièla de noscia realtèdes.«

De più su La Usc stampèda de en jebia ai 19 de dezember.  (MCI)