La Usc di Ladins

Mostra da Nadel tl Museum Gherdëina
Criples y figures dla cripl de Gherdëina dal 17ejim al 20ejim secul
Sëuraprò ala produzion populera dl 18ejim y 19ejim secul cun figures de pastri cun si biesces y rëiesc a ciaval, pòssen amiré figures dla cripl dl’età baroca y Biedermeier, coche nce cumposizions artistiches dl 20ejim secul. Danter la opres preziëuses iel da auzé ora n fragmënt gotich tardif cunservà dl’Aduraziun di Rëiesc, la cripl baroca uriginela dla dlieja da Sacun, la cripl-autere cun la scenes dla Natività de Luis Insam dl Tavela y la cripl da Nadel particulera de Rudolf Moroder dl 1910 cun passa 50 figures zipledes.
Vijites menedes tla mostra da Nadel vëniel pità for de juebia ai 19 y 26.12 y 2.01, dala 4 domesdì cun Dr. Wolfgang Moroder (la vijita ie debant).
L team dl Museum Gherdëina Ve aspieta cun legrëza, dala 10-12:30 y 14-18 (stlut ai 24+25+31.12 y 01.01) y mbincia a duc canc n bon Ann Nuef 2025! Infos: www.museum gherdeina.it, tel. 0471 797554

RÅ ROA – mostra de Manuel Bauer y Ebba Olsson
L Circolo – Lia Mostra d’Ert, nvieia a unì a ti cialé ala mostra de Manuel Bauer y Ebba Olsson, dal titul »RÅ ROA«, tl self dla mo­stres dla Lia Mostra d’Ert
L titul »rå roa« ie metù adum da la parola »rå« (sve­desc per cruf) y roa (dal gherdëina), y propi sun chësta tematica se stiza la opres mustredes.
Co se trasfurmea pa ide­ies cruves te n prozes de mudamënt? Chësta du­manda ne nteresa nia mé la storia dl’ert, ma nce Ebba Olsson y Manuel Bauer. L ie na cossa che pëia via cun n entusiasm belau ussesif, per ruvé n fin pra la du­manda zentrela: cie se làscel pa mo fé y co pa?
Do trëi ani de stude de­berieda tla Cademia di Belle Arti de Viena, pre­jënta i doi artisć pusizions urigineles, che – nce sce i toca pra la medema epoca – pëia via da pruspetives defin autramënter, abinàn ala fin na lerch per lauré deberieda a Viena.
La mostra resterà da udëi nchin ai 12 de jené, uni di dala 16:00 nchin la 19:00 y de sada y dumënia nce danmesdì, dala 10:00 nchin la 12:00.

SunRisa

• 
•  

View the embedded image gallery online at:
https://www.lausc.it/manifestazions-y-evenc/28510-manifestazions-atuales-speziales#sigProIde910ed1d96

en gaujiun dla Copa dl Monn
En ocajiun dles gares de Copa dl Monn de schi tl’Alta Badia, podarán pié ia cun i schi bele le lönesc dales 7:15 y se gode n bun gosté tles üties
Le lönesc ai 23 de dezëmber, en ocajiun dla manifestaziun SunRisa, podarán jí cun i schi bele da doman adora, se gode le lové dl sorëdl y ester danter i pröms sön pista. Te chësta ocajiun podarán ince storje pro te cin’ üties dl raiun por n bun gosté cun produc sagns, aconsiá sciöche gosté ideal dala esperta de nudrimënt Elena Casiraghi. I implanc portamunt de Col Alt, Costes dal’Ega, Arlara y Piz Sorega sará daverc dales 7:15 inant y chi de coliamënt danterite dales 7:30 inant. I ofizi skipass de Corvara y San Ciascian deura dales 7:10 y dai paisc de Badia, La Ila y Calfosch gnarál metü a jí dales 6:45 ales 7:45 n sorvisc de transfer por podëi pié ia. Do gosté él la poscibilité da jí a ti ciaré ala gara de slalom de Copa dl Monn sön la pista Gran Risa, cun la pröma manche che mët man dales 10:00. Deplü informaziuns sön l’iniziativa y les üties sön www.altabadia.org.

Orars de daurida MusLa Ursus ladinicus – invern
Le Museum Ladin Ursus ladinicus deura ince d’invern! Dai 26 de dezëmber inant é les portes dl museum a San Ciascian davertes vigni jöbia y vëndres dales 10:00 ales 18:00
Le Museum Ladin Ursus ladinicus é dediché ala laurs preistorica di andri y ala geologia dles Dolomites. Te n frabicat nü de trëi alzades se destënn fora la mostra sön la storia y l’ambiënt de vita dles laurs di andri, che viô dan da plü de 50.000 agn y i fossii dles Do­lomites. Al vëgn cunté la storia afascinanta dla laurs di andri, n tier erbivor che podô pesé cina a 1.200 kg. L’ander de Conturines, olache les laurs viô a n’altëza de feter 2.800 metri, é conscidré le sit plü alt dl monn olache al é gnü ciafé laurs y liuns di andri. L’ander de Conturines é ince na testemonianza dla storia climatica dl passé y atuala dles Dolomites. Descuride deplü sön la contrada da munt incër San Ciascian ia y gnide lassura ciodí che al foss sté plü oportun, dan da zirca 230 miliuns de agn, da s’armöie plütosc cun na brëia da surf co cun n snowboard. Gnide a vijité le museum chësc invern, i ves aspetun!