La Usc di Ladins

»L’èga é vita, l’acqua è vita, Wasser ist Leben, water is life!« i à ciantà i scolees de la populères de Fascia. En jebia ai 20 de mèrz, te piaz de Comun a Poza, l messaje de cotant che chest ben l é prezious, che no l é zenza fin e donca da tegnir da cont, à ressonà bel adaut te la cianties di bec de la clasc terzes de la populères de Cianacei, Poza, Vich e Moena, che à ciantà ensema a chi de la quarta e quinta da Vich e ai picoi de la scolines de Pera e Poza. Na scomenzadiva che é stata metuda dant belapontin en ocajion de la giornèda mondièla di giacees e de l’èga dai 21 e 22 de mèrz.

»Cognon se recordèr che sion zitadins de noscia val ma soraldut de nosc pianet, donca sion duc responsaboi, ogne dì, de noscia azions« l é stat l messaje che i à volù uzèr fora.

Te piaz, bel bonora, te na bela dì da soreie che ge à dat amò più luster ai colores e a la viveza de n bel grop de scolees compagné da sia ensegnantes, se à binà ence sacotent genitores e giaves. Dut intorn l era stat tacà fora i dessegnes e i grafics fac dai bec e la bezes per moscèr cotanta èga che sfrelausson.

De più su La Usc nr 12 dai 28 de mèrz: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper.


 (Monica Cigolla)