La Usc di Ladins

Dan chi diesc agn jô la jënt ciamó te chës plazes a Balsan a protesté cuntra i paiamënc alc y les pensiuns di politics provinziai/regionai, sëgn él ma plü val’ foliet che scrí di aumënc che la politica regionala y provinziala se deliberëia cun püces usc decuntra. I me damani bëgn sce al n’é plü degü na morala tla politica! Y, olá é pa la jënt che critichëia y protestëia cuntra chësc comportamënt »self-service« che spënn i scioldi dles cutes dla jënt zënza damané zacai? Zacan en de án podü lí tl foliet »Alto Adige« che i politics regionai de Trënt-Balsan á ciafé tla »busta paga« de merz bëgn 6.894,36 Euro lordi de aretrac relatifs al 2022 y ciamó lapró 12.221,76 Euro lordi por le 2023. Y che al mancia ciamó i aretrá por l’ann 2024 che dess impormó gní paiá fora d’isté. Mefodër cun le mëis de jená 2025 (y vigni mëis sëgn) pëia do i aconsiadus regionai na indenité alzada tla mosöra dl 10,7%, a bëgn 1.117 Euro lordi, che porta la paga basa de n aconsiadú provinzial a Trënt y Balsan al compëns mensil a 11.563,00 Euro lordi. 
Sá pa i politics provinziai/regionai ciamó tan de scioldi che chisc é?! Ái pordü le sëns dla mosöra? La politica locala (al é nüsc politics litá a livel provinzial/regional!) ne dess nia s’astilé insciö, ajache ma püc jogn y püces fami lies de status sozial mesan-bas ti á ciamó crëta ala politica. Insciö pón desfá i valurs dla democrazia! Dal 2017 incá pëia do deplü aconsiadus, i assessurs, i vize presidënc y le presidënt dla Junta provinziala a Balsan na indenité extra-tributara (chël ó dí »pert dla paga zënza cutes) aladô dl moto »deplü neto dl bruto«: 4.600,00 € al mëis por le presidënt dla Provinzia, 4.100,00 € por sü vize, 3.300,00 € por le presidënt dl Consëi provinzial, 2.400,00 € por sü vize, 3.600,00 € por i assessurs provinziai, 1.200,00 € por vigni componënt dl presidium, 800,00 € por i presidënc dles comi sciuns legislatives, ii. I politics che pëia do chësta indenité á ala fin te gofa de beles somes neto: le 35% dl paiamënt dl presidënt dla Provinzia é lëde da cutes, le 7% por n aconsiadú provinzial »normal«. Porchël paia le presidënt dla Junta provinziala ma plü cutes por mesa mënter le 23% de so paiamënt. I me damani bëgn che che paia spo perts dla politica, sce nia les cutes? La Provinzia da Trënt ne anüza nia chësc sistem de paiamënt, en pert »extra-tributar« de sü politics, mo sotmët almanco dötes les paghes ales cutes. 
Sá pa nüsc politics provinziai a Balsan che te nüsc paisc él milesc de por sones jones y families che ne pó nia plü s’impormëte da jí a mangé la pizza la domënia sëra? Da avëi n cuatier autonom y so ne baia chëstes fami lies dî nia plü – oramai é tröpes porsones rassegnades y ares ne vá gnanca plü a protesté!