La Usc di Ladins

Ueves da Pasca per n bon fin
La AIL–assoziazion taliana contra la leucemia – mët a jì n vënderdi ai 4 de auril sun Pitla Plaza de S. Antone la azion di ueves da Pasca
La azion che vën metuda a jì bele da plu ani incà, à l fin de judé y dé n cun­tribut ala nre­scida n con’ i tumores dl sanch (leu­ce­mies, linfoms y miel­oms). Sun Pitla Plaza de Sant Antone a Urtijëi puderàn n vënderdi ai 4 de auril ntan dut l di cumpré de biei ueves de ciculata.
N pensier speziel ti va a Cristina Moroder Gasser che ova ulù che la mani­festazion unisse fata nce a Urtijëi – purton inant si sëmi! I ulenteres dl’AIL rengrazia bele danora.

»King of the Circolo: skate contest«
L Circolo–Lia Mostra d’Ert nvieia a na sëira de »skate« y mujiga, n sada ai 29 de merz dala 18:00 inant tl self dla lia
Per l terzo iede uniràl a s’l dé la cum­petizion sun l skateboard per fé ora l »King of the Circolo« (rë dl Circolo, ndr.). La giaurida ie dala 18:00, cun mujiga y skate liede.
Dala 19:45 saràl pona la pitla cum­petizion cun de biei pesć da pudëi vëncer y dala 21:00 inant jiràla inant cun mujiga punk-rock, cun verona­morta, La foresta y DJ Set de bgbclife.
Duc i apasciunei y nteressei ie de cuer nviei!

La Giatiscima
L’Uniun Sport La Ila cun les Scores de Schi da La Ila y Dolomites inviëia düc chi da La Ila ala gara dl paisc »La Giatiscima 2025« en sabeda ai 5 de aurí
La gara de schi dl paisc da La Ila mët man cun l’incuntada dles pels dales 7:30. Dedô vára inant cun la gara de schi, che mët man dales 9:30, intrames sön la pista de Gardenacia. Do la gara é düc i scric ite inviá tla Ütia Florian a marëna y ala premiaziun.
Les iscriziuns vëgn tutes sö pro la Scora de Schi da La Ila al 0471 847258, cina en jöbia ai 3 d’aurí anter les 17:00.
Informaziuns plü menüdes ciafon ince sot ala plata internet www.uslaila.it

»Occupy Circolo«
L Circolo–Lia Mostra d’Ert mët a jì na mostra nterativa tl self dla mostres dla lia
La scumenciadiva de tò ite la lerch tl Circolo à l fin de mëter l focus ala cundizions ries dl marcià imubilier. N’ena alalongia sarà l Circolo na sort de stua publica, doi paroles che se stluj perdrët ora l’una cun l’autra: la stua coche lerch privata y scuneda vën spusteda tl publich. L nvit al:a vijitadëur:a ie chël de se sentì da cësa y tò pea cosses per rënder la lerch tla mostra plu plajëula y persunela.
La mostra »Occupy Circolo« unirà giaurida ai 1. de auril dala 20:00 cun na pigiama party, ulache l sarà nce mesun sté sëura nuet, durmì y gusté deberieda. Gën sce n uel to pea zeche da maië y da bever da partì.
Daldò jiràla inant nchin ai 8 de auril, uni di dala 18:00–20:00.

Clima: ci podunse pa (ciamó) fá?
Ai 9 d’aurí él tl Museum Ladin a San Martin n referat cun Marc Zebisch dl Eurac
Le Museum Ladin inviëia al referat »Mudamënt dl clima söl monn – y tl Südtirol. Ci podunse pa nos (ciamó) fá?«.
Al vëgn tigní en mercui ai 9 d’aurí dales 18:00, tl Museum Ladin Ciastel de Tor a San Mar­tin. Referënt é Marc Ze­bisch, le responsabl dl »Zënter por mu­damënt dl clima y trasfor­maziun« dl Eurac. Le referënt analisëia ci mosöres y strategies che an podess invié ia, sides a livel local co global, por contrasté les de­sfides da sëgn.

Infopoint informatica
A La Ila y ince a Badia vëgnel indô pité deplü ocajiuns por fá domandes che reverda l’adoranza de computer y fonin. Pröm termin ai 3 de aurí
Le Consëi de formaziun Badia mët a jí ince chësta aisciöda le »Infopoint informatica«, che s’oj a dötes y düc chi che adora n sostëgn cun computer y fonin. Co scrí na e–mail? Co fá n pü’ de lerch sön le smartphone? Ci é pa le SPID y co pón pa le fá? Chëstes y tröpes d’atres domandes podará gní portades dant. Referënta é Maddalena Valentini, pedagoga di media.
Le »Infopoint informatica« vëgn pité te bi­blioteca a La Ila ai 3 y ai 11 d’aurí dales 10:00 ales 12:00, sciöche ince ai 15 d’aurí, ai 5 y ai 13 de ma dales 15:00 ales 17:00. Lapró vëgnel pité te biblioteca a Badia, ai 23 d’aurí dales 15:00 ales 17:00. Al é da se prenoté danfora al 347 6880248.

Zidlé cunici da compagnia y da alevamënt
Chësc é l’argomënt de n domisdé de informaziun, che vëgn metü a jí ai 5 d’aurí a Badia
La Uniun Patrones de Badia, cun le sostëgn dl Consëi de formaziun dl Comun de Badia, mët a jí en vëndres ai 5 d’aurí dales 16:00 ales 18:00 n domisdé sot al tema »Zidlé cunici da compagnia y da alevamënt«, tla Ciasa J. B. Runcher. La doturia dai tiers Francesca Mariani spligará co tigní indortöra i cunici y de ci cures che ai á debo­jëgn, l’alimentaziun y les maraties. Esperc dl’assoziaziun di zidladus de cunici dl Südtirol cuntará i criters de cualité dles razes plü importantes y le zidlamënt de cunici de raza. Le domisdé se stlüj jö cun na picia marëna.

»Il matrimonio era ieri«
Chësc é le titul dl teater da rí che vëgn porté dant en domënia

• 
•  

View the embedded image gallery online at:
https://www.lausc.it/manifestazions-y-evenc/29189-manifestazions-atuales-speziales#sigProId03a52bd911

ai 6 d’aurí domisdé a Al Plan
La Nuova Compagnia di Teatro da Bornech inviëia dër bel da gní a ti ciaré ala comedia »Il matrimonio era ieri« de Giuseppe Della Misericordia, adatada y sot la regia de Antonio Loguercio. La rapresentaziun sará en domënia ai 6 d’aurí dales 16:30, te salf dles manifestaziuns d’Al Plan. Te chësc teater nen vara dles deja­ventöres dl jonn Stefano, che resta bloché te aeroport por groaries de­svalies, y röia baldi massa tert a süa noza. Ci che al vëgn lassura dailó, gnará presenté te chësta comedia, olache düc i clichés sön la noza y sön l’amur vëgn trac sotissura. Y por capí valgünes cosses, mësson val’ iade propi ti ciaré al inzescü.

Che me dëida pa? Le Sorvisc dl’assistënza a ciasa!
Ai 28 de merz él a Al Plan n domisdé de informaziun organisé dala Portina por l’assistënza y cura
La Portina por l’assistënza y cura dl Raiun sozio–sanitar Val Badia organisëia n domisdé de informaziun sura le Sorvisc de assistënza a ciasa. Le sorvisc dëida i familiars che fej le guern a porsones atempades, y l’obietif é che les porsones atempades pois sté le plü dî che ara vá te so ambiënt conesciü.
Al gnará mostré sciöche la cura dl corp dess gní fata y co adoré i injins sciöche le lift da bagn che dëida alzé ite na porsona tla vasca o le »Rutschbrett« che alisirëia i spostamënc dl assistí p.ej. da n scagn al divan, co fá por evité plaies y d’atres com­plicaziuns. Al gnará ince dé consëis co stimolé la mobilisaziun fajon val’ spazirada o certi movimënc. Implü gnarál mostré co se sconé le spiné da fá le guern. La Portina por l’assistënza y cura dá infomaziuns sön sorvisc, poscibilités de sostëgn y de alisiramënt, sön aiüc che é danman, sön sostëgns finanziars. I sëis bel inviá en vëndres ai 28 de merz dales 13:30, tl salf dla Raiffeisen d’Al Plan a tó pert al domisdé de informaziun.

Referat sön la violënza assistida
»Canche al é violënza danter la mama y le tata, ne pó i mituns nia s’un sciampé! Le drama dla violënza assistida.« Chësc é le titul de n referat ai 9 de aurí, cun la dot.ia Giuliana Franchini
Canche mituns mëss vire y/o odëi situaziuns de violënza fisica, verbala y psicologica danter geniturs o porsones a chëres che ëi é tacá afetivamënter, baion de violënza assistida. Dala pandemia incá se á le numer de caji de violënza assistida no ma dupliché, mo é ala fin dl 2024 chersciüs de trëi iadi tan! La dr.ia Giuliana Franchini, psicologa y pscicoterapeuta di mituns dij: »Al é fondamental rumpe le chît y prevení la violënza. An mëss savëi da lí i segnai dl sté ert di mituns a na moda che ai pois crësce svilupan al miú sü afec y sües emoziuns.« I mituns che vir violënza assistida, sará da adulc porsones che se stentará da vire relaziuns afetives y restará condizioná da chëstes esperiënzes.
Al gnará ince splighé la manira de lauré dles colaboradësses dl’Assi­stënza sozio–pedagogica dl Raiun Sozial Val Badia. Düc é dër bel inviá en mercui 9 de aurí dales 19:30, tl salf di stödafüch a San Martin de Tor. Organisaziun: Comité de Raiun Val Badia.