La Usc di Ladins

L zenter de Vich se à viventà amò n’outa en vender ai 21 de mèrz, canche la sociazion Bela Ladinia, col didament de n bel grop de volontadives, se à dat ju per meter a jir n’autra bela edizion del Trofeo memorial Tita e Marco.
La garejèda de schi da mont pissèda per recordèr Tita Weiss e Marco Rasom, i doi fenc da Vich morc sot la levina sul Scalieret ai 28 de mèrz dal 1991, la é ruèda a la edizion numer 28 e da semper la met adum sport, legreza e comunanza, aspec che fajea pèrt de la vita de chisc doi joegn benvolui del paisc.
Dal zenter de Vich da les 6 da sera à tacà a pontèr via i prumes schiadores, chi del grop no agonistich che i era de 80 e che i se à fat na bela raida fin sun Ciampedie zenza se cruzièr di menuc. 
Da les 8 da sera l é peà via enveze la 43 cobies che col temp les volea se mesurèr te la trei classifiches pervedudes: cobies de ic, de eles o mescedèdes.
Rué sun Ciampedie, per duc l era n bon bicer de té ciaut e dapò ló da la baita Checo la festa, con premiazion, loteria e na bona cena.

De più, con la classifica di miores e duc i resultac ladins, su La Usc nr 12 dai 28 de mèrz: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper.


 (Lucia Gross)