La Usc di Ladins

Do n an e passa de lurier l é ruà a compiment l projet dal titol »Nosc temp« de la sociazion culturèla Antermoa col responsabol Davide Baldrati. Se trata de la regoeta de cinch librec fotografics con i retrac fac da cinch joegn: Angelo Endrich, Fabio Favé, Arianna Rasom, Luca Zacchia e Nicole Zorzi.

En sabeda ai 15 de mèrz te sala de Consei de Comun de Cianacei Baldrati à prejentà i lurieres fotografics ensema ai autores e l é stat rengrazià duc chi che à tout pèrt al crowdfunding. Belapontin percheche chest projet à podù ruèr a compiment demò de gra al didament de 81 persones che à dat sie contribut per la stampa. A duc ge é stat consegnà la copia del liber che i à cernù de sostegnir.

No l é chest l prum projet fotografich de la sociazion Antermoa. L fotograf Davide Baldrati à prejentà en curt duc i lurieres che l é stat fat te chisc egn passé: dai corsc, ai laboratories, a la mostres e la publicazions che, de gra al didament de esperc, à metù al luster e valorisà la pascion e l’èrt di joegn de la val.

Chest ultim lurier, »Nosc temp«, l regoi la fotografies de chisc cinch joegn che à tout pèrt per desvalives egn ai laboratories de la sociazion e i à volù esplorèr travers i retrac sia pascions e si enteresc desche la musega, i viajes e i lesc olache i vif.

Se pel lejer dut su La Usc nr 12 dai 28 de mèrz: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper.


 (Monica Cigolla)