La Usc di Ladins

»Son n lapisc te la mans de Die«, chesta frasa de Mère Teresa de Calcutta l a é stata al zenter de la Cena pureta che da egn l Grop Miscionarie Freinademetz e Mato Grosso endreza tel temp de Careisema per envièr la jent a stèr adum con legreza e a spartir n piat scempie e n bicer de èga neta e no desmentièr che n muie de persones tel mond chesta cena pureta les pel demò se la ensomeèr.

En realtà, descheche à dit al scomenz i volontères del Grop Miscionarie, proprio pureta chela cena no la era: pomes de tera chec co la schiufa, capusc en salata e na fieta de formai, e dapò amò ence pomes chec. Na cena scempia aboncont, e soraldut solidala, metuda ensema col didament de dotrei firmes e privac che à sport i prodoc e che é stac rengrazié dal Grop Freinademetz, ensema coi cheghes che se à metù a la leta per cojinèr e i joegn e volontadives che à didà a portèr fora e rencurèr su.

Chest an l apuntament de la Careisema l é stat endrezà en sabeda ai 22 de mèrz, desche semper te Oratorie de Poza, e l à abù desche protagonista la miscion de l’Operazione Mato Grosso de Encañada, n post a 3000 metres de auteza su le Ande del Perù, a 15 ore de bus da Lima.

L é chiò defat che la joena fascèna Anna Deluca é stata per doi outes, passa n an en dut, a fèr esperienza de volontariat. Do la cena Anna à portà dant sia testimonianza, compagnèda da video e fotografies, e dapò la ge à sport a duc n lapisc, fornì con na sort de capula de drap andin e con su scrit per talian e spagnol apontin la cognosciuda frasa de la Sènta Mère Teresa.

Se pel lejer de più su l'esperienza de Anna su La Usc nr 12 dai 28 de mèrz: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper.


 (Lucia Gross)