La Usc di Ladins

Libres n é de vigni sort. N é de chi scric ben, che respeta duta la regoles editorièles ma che, canche aon fenì de i lejer, se n ascorjon che no i ne à lascià trop, ajache la paroles scrites laite no les é ruèdes a mever vèlch te nosc cef o te nosc cher. Vèlch outa enveze se troon a aer te man libres magari più scempies, ma che doventa desche n picol melaur. »Dietro la lavagna« l è un de chisc, o amancol l é segur n melaur per n muie de persones che te chela stories scempies e tel percors che l les à fates nascer à sentù e sent crescer recorc, emozions, sentimenc de legreza o de encresciujum, che fèsc ben al cher.
L é stat dat fora te la colana »Live« de n editor de prestije desche Erickson, ma l é nasciù te Fascia, e l é l frut de la colaborazion anter desvaliva istituzions e sociazions. Autores l é passa 15 persones de età de noscia val che tol pèrt a »Star ensema«, l Zenter de enconter che vegn endrezà te oratorie de Poza e l é stat rencurà da Elisabetta Vanzetta.
»Dietro la lavagna« l é stat prejentà en jebia ai 20 de mèrz a Sèn Jan, te la Cèsa de Paussa de Fascia e l vegnarà prejentà amò a Moena en mèrtesc ai 8 de oril da les 5 domesdì te la Sala Rovisi del Comun tel chèder del event »Troes/Sentieri« en colaborazion con la Bibliotea e l Comun de Moena, na rassegna de scontrèdes su libres e autores de nosc raion che se verc en mercol che vegn ai 2 de oril, semper da les 5 domesdì te la sala Ropvisi del Comun, con n dialogh su la publicazions de Fabio Chiocchetti »Letres da Larcioné« e »Paroles fora de crigna« dates fora da l’Union di Ladins de Fascia en coedizion.

De più su La Usc nr 12 dai 28 de mèrz: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper.





Se pel lejer dut su La Usc nr 12 dai 28 de mèrz, sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper.



 (Lucia Gross)