La Usc di Ladins

En jebia ai 12 de dezember la cultura ladina é ruèda fin a Roma no demò per l convegn su la mendranzes e la lege 482, ma ence per la premiazion de la 12^ edizion del concors »Salva la tua lingua locale«, olache l prum pest te la sezion di saggi, dedichèda al linguist Tullio de Mauro, é jit a Fabio Chiocchetti per sie liber ‘Letres da Larcioné’.
L liber de Chiocchetti é stat premià per l’emportanza de la letres de Amadio Calligari publichèdes laite, che à permetù e permet de studièr e tramanèr elemenc veiores del lengaz e de la cultura oramai jic perdui o desmentié, ma ence per l fon lurier de analisa e coment fat dal autor e per l rich indesc lessical junsom al liber. Defat se no fossa zachei, descheche l é sozedù con P. Frumenzio Ghetta de Martin, che se cruzia de enrescir, binèr ensema e studièr fora, i scric veiores restassa te n archivie, te n sotcuert o adertura i fenissa tel CRZ anter l papier veie. 
Chiocchetti à scomenzà l lonch lurier de studie e valorisazion di scric veies amò da diretor del Istitut Cultural Ladin, e l à ciapà amò maor gaissa canche, del 2018, l é stat bon de aer da la familia i documenc de Hugo de Rossi: n don per duta la comunanza, patrimonie prezious per la cultura e l lengaz ladin. D’uton de chel medemo an, per la colana ‘Studi e ricerche’ del ICL, Chiocchetti à dat fora ‘Scritores ladins. Materiali per la storia della letteratura ladina di Fassa’, olache per la pruma outa vegn fora ofizialmenter l inom de Amadio Calligari desche vero autor de la letres che De Rossi à durà desche fontèna per sie lurier su la lejendes de Fascia.

Podede lejer dut su La Usc stampèda de en jebia ai 19 de dezember.  (Lucia Gross)