La Usc di Ladins

La é dassen rica l’atività che l’Union di Ladins de Fascia à portà dant via per chest an 2024. N bilanz che la sociazion à prejentà en vender ai 13 de dezember te Ciasa de la Moniaria a Sèn Jan a n bel grop de jent e autorità. L president Fernando Brunel, ensema a la neva diretora Nives Iori, à tacà ite col ge sporjer l develpai al Comun General de Fascia, patron de la cèsa, per la lèrga che l ge dèsc a l’Union e a la redazion de La Usc di Ladins e per ge aer dat ence i locai per i desvalives corsc che l é stat endrezà: chel de depenjer i eves da Pèsca e i fiores a la fascèna e chel out ai conscric per se enjignèr l gramièl e l ciapel aldò de la tradizion. 

L’Union di Ladins se à tramudà tel nef cartier te Ciasa de la Moniaria sobito do Pèsca. N plindernament spetà da temp, per la storia che lea la sociazion a chesta cèsa stata de la Comunità de Fascia, ma ence per ge dèr zacan na senta adatèda. A duc chi che se à dat ju per ruèr a chest travert ge é stat sport n detelpai e n segn de recognoscenza.

L é stat metù dant duta l’atività endrezèda via per chest an e recordà che l 2025 sarà n an emportant per l’Union di Ladins ajache la festejarà l cedean toron di 70 egn. L é stat ence recordà l lirier prezious de La Usc di Ladins e en ultima Anna Mazzel à prejentà l nef numer de la revista Gana, enjontà al ultim numer de La Usc.

De più su La Usc stampèda de en jebia ai 19 de dezember.  (Monica Cigolla)