La Usc di Ladins

Stories de vita: serada de letöra
L’auturia Astrid Kofler röia te Ciasa de palsa a San Martin ai 17 de dezëmber. Ara lí fora de sü libri, olache ara á baié cun porsones sura i 90 agn
La Ciasa de Palsa Ojöp Frëinademetz inviëia dër bel en mertesc, ai 17 de dezëmber dales 20:00, tl Barjënt, ala serada de letöra adöm ala auturia Astrid Kofler. Kofler é conesciüda por sü libri »Alles gut« y »Alles wird gut«, te chi che ara reporta intervistes y dialogs cun porsones de tëmp sura i 90 agn.
La vita de chëstes porsones n’é nia dagnora stada saurida, mo dötes desmostra na gran baldëza y mët a löm episodes olache chi che ascuta sö dij: »da chësta porsona oressi me tó n ejëmpl«.
La serada é por todësch; ara é daverta a düc y debann.

Cunzert da Nadel dla Lia San Vinzënt
La Lia San Vinzënt de Urtijëi nvieia de cuer al cunzert da Nadel cun mujiga y tesć che passenea ite te chësc tëmp de Avënt, ncuei, vënderdi ai 13 de dezëmber, dala 20:00 tla dlieja San Durich de Urtijëi
L sunerà y cianterà l Cor di ëi Reatia, l Frauendreigesang cun Otto Delago, Egon Lard­schneider cun na grupa de strumënc a fla, David cun si armonica y Agnes Irsara Se­noner liejerà dant de biei tesć.
L vën damandà na bona man. I scioldi trac ite ti jirà ala Lia San Vinzënt per ti judé a persones y families da tlo che se n sta manco bën.
N rengrazia bele danora y mbincia n bon scuté su.

Mostra de Willy Verginer a Trënt
La mostra persunela tla galaria Studio Arte Raffaelli de Verginer cun l titul »Revêrie« unirà giaurida n juebia ai 17 de dezëmber dala 18:00
L artist prejënta na lingia de scultures nueves, partides su te trëi sezions che ti dà forma a na cunteda poetica n armunia cun la sales dl Palazzo Wolkenstein.
Tla prima sala sarà i prutagonisć tieres salveres y esotics, che mët sotsëura la realtà. I ie padrons dla mubilia sacrela y dl aredamënt baroch. Tla segonda sala abìnen figures che dorm,lascian daviert l pensier sce i semieia o i se dorm via la realtà cun duc si problemes. Tla terza sala pòssen udëi n culiamënt danter persones y plantes.
La mostra resta davierta nchin ai 3 de mei, tl Studio d’Arte Raffaelli, Palazzo Wolkenstein, streda L. Marchetti, 17 – Trënt. Orars: dal lunesc nchin al venerdì, 9:30 - 13:30 y 15.30 - 19:30. Sada: 10:00 -12:00 y 16:30 - 18:30.

Cunzert dl’Urchestra Haydn
I Jëuni de Mujiga Gherdëina nvieia al cunzert dl’Urchestra Haydn: n lunesc ai 16 de dezëmber dala 20:00 tla Cësa di Cungresc a Urtijëi
Per la lingia di cunzerc di Jëuni de Mujiga de Gherdëina ne pòssel nia mancë chël dl’Orchestra Haydn de Trënt y Bulsan, chëst ann sot ala bachëta de Marco Pierobon.
Sun l program saràl chëst ann l cunzert per tumbrëta tl re, de Giuseppe Tartini, l cunzert per tumbrëta tl mi/be-moll maggiore, Hob. VIIe:1 de Joseph Haydn, la 35ejima sinfonia de W.A. Mozart te re maggiore, K 385 »Haffner« y l cunzert per tumbrëta tl mi maggiore de Johann Nepomuk Hummel.
La chertes de ntreda ie da giapé pra la cassa y danora tl ufize dla Lia per l Turism de Urtijëi.

Sommelier sön pista tl’Alta Badia
Ince tratan chësc invern vëgnel metü a jí sön les pistes dl’Alta Badia l’iniziativa »Sommelier sön pista«, che valorisëia y fej conësce i mius vins de Südtirol
Indöt vëgnel metü a jí set apuntamënc, che é söl program ai 17 de dezëmber, ai 14 y 28 de jená, ai 11 de forá, ai 11 y 18 de merz y al 1. d’aurí. An se incunta dales 13:45 sön Piz La Ila, por pié ia cun i schi adöm a n maester de schi y n sommelier. Le grup de partezipanc storj pro te döes üties, olache al gnará ciarcé na seleziun di mius vins de Südtirol, che vëgn spligá dal sommelier.
Por tó pert a un di apuntamënc mësson se scrí ite ti ofizi turistics dl’Alta Badia o online al prisc de 40,00€ a porsona. I posć é limitá. L’iniziativa vëgn metüda a jí da Alta Badia Brand, en colaboraziun cun le Consorz di Vins de Südtirol y l’Assoziaziun di Sommelier de Südtirol.

Prejentazions dl liber per pitli y granc
L Istitut Ladin Micurà de Rü à l plajëi de nvië a doi prejentazions dl liber nuef »Ujep y la stries mates«: la prima a S. Martin de Tor y la segonda a S. Cristina
L liber nuef de Maria Paola Asson, scrit te trëi lin­gac, unirà prejentà ncuei vënderdi ai 13 de dezëmber dala 15:00 tl Istitut Ladin Micurá de Rü a San Martin de Tor. Sonia Ortlinghaus fajerà l acumpaniamënt musichel sun l’erpa.
N duman sada ai 14 de dezëmber dala 15:00 saràl la prejentazion tl Self dl teater de S. Cristina. Sonia Ortlinghaus sunerà l erpa y l cianterà l Cor di Mutons de Sëlva.
Granc y pitli ie de cuer nviei.