La Usc di Ladins

Do la esibizion del prum grop de teater de val, chel de La Mizacoles, con sie ‘lomescel da desgatièr’, la rassegna de teater peèda via tel meis de november per endrez di Servijes linguistics del Comun General de Fascia, é jita inant con n auter grop de comedianc fascegn, i Bontemponi, che dai 7 ai 10 de dezember i à portà legreza per ben trei outes, a Moena, Poza e Soraga, con sia comedia ‘Zacan zeche da zacar’, con la regia de Roberto Dorich.

En vender ai 13 de dezember su la paladina del PalaDolomites Paola Costa, col rit simbolich pissà per chesta rassegna, la ge à passà l testamonech a inom del feruscol grop de atores da Sèn Jan a Michela Marangoni de la Sociazion Antermoia. Sobito dant l conseier de procura a la cultura ladina Amedeo Valentini ge aea dat l benvegnù al gran publich ruà ta Ciampestrin, l aea rengrazià dut sie staff e recordà Vigile Iori, a chel che la rassegna é dedichèda. Vigile l é stat n gran pascionà de teater, ator e regist che à portà la sperimentazion su la paladines de Fascia e l à portà inant l lengaz ladin travers la scola, la letradura e ence apontin l teater, e l ne à lascià ai 16 de dezember del 2022.

Podede lejer l articol co la rezenjion del spetacol su La Usc stampèda de en jebia ai 19 de dezember.  (Lucia Gross)