La Usc di Ladins

Rué a la fin del meis de dezember, apede a regai da Nadal, panetons e pandores, te ogne cèsa l é ence besegn de endrezèr n nef calandèr. Chest an, per chi che à gust de tachèr su per parei piates beles da color e sgalizentes, la studentes de la clas 4 LAF del Liceo artistich de la Scola ladina de Fascia les à enjignà “Mountain flowers – Fiores da mont 2025”, n calandèr vif e gustegol, con de bie dessegnes de piantes e fiores de nosc teritorie. 

“Fiores da mont” nasc de gra a n projet metù a jir da la dozentes Lara Steffe e Stefania Pederiva de disciplines grafiches e pitoriches te la ores de CLIL (Contegnui e Lengaz Integré tel Laboratorie) e, apede a la pèrt figurativa, te sia piates l porta dant de bie tesć e pensieres per doi lengac, ingleis e ladin, col sostegn del OLFED, l Ofize Ladin de Formazion e Enrescida Didatica de la Scola ladina de Fascia.

Dal pont de veduda grafich, i dessegnes di fiores che compagnarà la jent te ogne meis del 2025 l é l resultat de n studie ascort de ideazion e interpretazion personèla da man da la studentes, che tel percors de realisazion les à dapò tramudà i dessegnes tradizionèi fac a man te prodoc digitèi, particolères e mingol fora de anter. 

De più su La Usc stampèda de en jebia ai 19 de dezember.  (Thomas Zulian)