La Usc di Ladins

La Crousc Biencia da 50 egn a Cianacei
En sabeda ai 21 e en domenia ai 22 la sociazion de volontariat per socors de la Val de Sora fèsc gran festa per l bel cedean
Al scomenz di egn ’70 l turism tachèa a cre­scer, per jir sa mont d’istà e coi schi d’invern ruèa n muie de jent che podea ence se fèr mèl e aer besegn de n socors asvelt. La soula am­bulanza te val la era a Vich te la sezion de val de la Crousc Checena, che no era desponibola a averjer na sezion a Cianacei. N grop de volontadives se à metù adum per troèr na soluzion e del 1974 i à podù averjer na sezion de la Crousc Biencia e ciapèr na ambulanza da Busan. L scomenz no l é stat sorì: per po­der aer contribuc provinzièi la sezion é passèda sot a Trent e del 1984 la é doventèda autonoma. Del 1988 l’à abù da l’aministrazion la senta te strèda Dantone, del 1996 l’à fat la convenzion con Trentino Emergenza 118 portan sia atività ence a Ciampedel e Mazin e del 2008 l’à podù plindernèr te la neva caserma de protezion zivila de Ciasates.
L é passà encomai 50 egn dai prumes vèresc e per festejèr coche carenea ades la Crousc Biencia de Cianacei endreza na bela festa.
Program:
En sabeda ai 21 de setember:
da les 18:00 aur l tendon al Fassa Park del Ciuch con aperitif e musega del DJ; da les 19:00 aur la cojines per sporjer da cena con hamburger gourmet, pomes fric, würstel e bretzel e da les 21:00 taca a sonèr l grop austriach ‘Schilcherland Buam’
En domenia ai 22 de setember:
da les 10:30 messa te gejia del Sacro Cher, do messa defilèda fin al Fassa Park del Ciuch e aperitif con la ciantarina Elena Favè (debant per duta la jent), la Musega Auta Fascia, i Schuhplattler da Ciampedel e l Grop Folk da Cianacei. Da les 15:00 manovra di volontères de la Crousc Biencia fora dal tendon e tai de la torta che ge vegnarà sporta a duc. La festa fenesc da les 17:00
N cors per aspiranc socoridores
Ence chest an la sociazion endreza l cors de formazion de prum socors, debant e avert a duc chi che à 18 egn compii. L cors endrezà dai istrutores volontères de la Crousc Biencia de Cianacei l pea via ai 24 de setember e l jirà inant con scontrèdes doi outes en setemèna de 2 ores /2 ores e 30’, da les 20:30 a les 22:30/23:00 de mèrtesc e de jebia, con lezions teoriches (en prejenza e/o online) e prateghes con 2 lezions da 4 ores de sabeda domesdì. Dapò sarà l met de fèr ence la formazion de socors sui portoes. Info a: crocebianca@emergenzacanazei.it – https:// emergenza canazei.it o su la piates social de la sociazion.
La ousc di volontères
»Esser te la Crousc Biencia vel dir portèr inant na realtà nasciuda acà 50 egn e fèr pèrt de n grop e de na comunità sèna. Saer co didèr fora na persona tel besegn l é de utol ogne dì, canche se é de servije, ma ence a cèsa o te strèda.«
»Stèr te chesta sociazion vel dir didèr la jent de noscia comunità, più volontères sion e maor l é nosc didament. Fèr ence demò l cors de formazion l é emportant: se ge capitassa zeche a n amich o a n parent, se pel dalbon ge salvèr la vita.«


L verzon Eden
L Circolo – Lia Mostra d’Ert nvieia ala mostra »Garden of Eden« de Maylis Paris y Lauréane Guerin: la giaurida sarà ncuei, vënderdi ai 13 de setëmber, dala ot da sëira tl self dla mostres dla Lia Mostra d’Ert
Maylis Paris y Lauréane Guerin, doi artistes visives y bele giut cumpanies, ti va permez deberieda ala tematica emblematica dl verzon Eden. Tramedoves à studià l corp dla persona y si pruspetives estetiches ie unides plu riches tres l amor per l culëur y per i materiai. De­berieda làsceles udëi si vijion y vocazion. Scebën che les rejona rujenedes desfrëntes, nasc si pascion dala medema sustanza. La mostra »Garden of Eden« ie n svilup dla tematica dl’età dl or, canche – aldò de truepa tradizions antiches – ëi y ëiles vivova te n bel verzon n armonia cun la natura...
La mostra resterà davierta nchin ai 4 de utober, dal merdi nchin la dumënia dala 16:00 ala 19:00, de sada y dumënia sëuraprò nce dala 10:00 ala 12:00. De lunesc iel stlut.


»Fitnesslandia«
La US La Ila mët ince a jí chësc altonn n program rich de ativités
»Fitnesslandia« se tlama le program dla US La Ila, cun cursc desvalies te palestra y tla nodadoia comunala da La Ila. I cursc vëgn tignis danter otober y novëmber, adöm ai istru­turs fitness dla US La Ila. Pité vëgnel acquafitness, nodé por mi­tuns dla scolina y elementara, pilates, meditaziun – mindfulness, cross training HIIT, karate sportif por la elementara, autodefenüda personala por mitans y mitus dla mesana, dles scores altes y adulc, tai chi, nodé y ginastica por por­sones cun dejabilité.
Por informaziuns plü menüdes y iscriziuns él da jí sön www.uslaila.it y por assistënza ales iscriziuns pón scrí a fitness@uslaila.it


Andreas Linder: Surfaces, digitally entangled
Tl Tublà da Nives te Sëlva saràl n duman, sada ai 14 de setëmber, dala ot da sëira la giaurida dla mostra de Andreas Linder, cun ntroduzion de Ursula Panhans-Bühler
Manieres analoghes de lauré ora images coche pitura y dessëni, la stampa tradiziunela y l zeluloid per fotografies y filmes ie tl tëmp de puec ani unides sburdledes da na pert dal mond digitel.
Dut cie che nes capitea dan al aparat da fé fotos, vën mascherà, suvënz te forma de aluzinazion.
L lëur artistich de Andreas Linder se tol ora dala fotografia digitela mumënc y par­ticuleres defin nueves, se basan sun la fun­damëntes de nosta perzezion y memoria, che se fej lerch coche oposizion y coretif te nosta maniera de tò su mprescions...
La mostra resta davierta nchin ai 29 de setëmber, uni di dala 16:00 ala 19:00, ora dl lunesc.


Ena Culturela
L Istitut Ladin nvieia – deberieda cun l Museum Ladin – a n’ena dedicheda al’ert, ala mujiga, leteratura y lijëndes, dai 21 nchin ai 29 de setëmber tla Villa Freischütz a Maran
N sada ai 21.09. dala 17:00 saràl la giaurida de na mostra cun lëures de Markus Val­lazza, Lois Anvi­dalfarei, Aron Demetz, Franz Kehrer, Walter Moro­der, Giovanni Rindler, Valeria Stuflesser. Ntroduzion de Ulrike Kindl y Katharina Moling. Daldò sunerà i Gota – Jan & Katia Moling. La mostra sarà davierta nchin ai 29 de setëmber, 14:00–18:00.
N dumënia ai 22.09. dala 17:00 sarà la leteratura tl zën­ter dla sëira: Roberta Dapunt purterà dant si scrit »vërt tla bocia« te n dialogh cun Alma Vallazza. Ntrodu­zion de Nadia Moling. N sada ai 28 de se­tëmber dala 14:00 inant pu­derà i mëndri dai 4 ani insù fé pea pra l lëuratuere creatif cun Giulia Bassi & Doris Rubat­scher: l argumënt ie Mol­tina, la prinzëssa dla mun­tanioles. Prenutazions: 0474 524020 – prenotaziuns@mu seumladin.it
L medemo di, sada 28.09. puderàn nce scuté su dala 17:00 la letura critica dla Lijëndes dla Dolomites de Karl Felix Wolff, purtà dant da Ulrike Kindl te n dialogh cun Herta Waldner.


Mëssa solëna de recort y rengraziamënt
En domënia ai 22 de setëmber 2024 dales 14:30 tla Dlijia da La Val
Por recordé la mort de siur Heinrich Videsott dan 25 agn vëgnel conzelebré la santa mëssa cun le ploan siur Mi­chael Lezuo y le Cor de dlijia da Runcadic.
Do mëssa saral na funziun pro fossa y tla finada agape tl foyer dl Salf dles Uniuns.
La santa mëssa gnará tras­metüda ince sön Radio Maria Südtirol y tl medemo tëmp mostrada sön youtube sot »Amici di don Enrico Vi­desott – Heinrich Videsott« y sön facebook »Videsott Heinrich Enrico«.


Curs de teater por scolares y scolars
A La Ila por diesc iadi dai 27 de setëmber 2024 inant, tres vëndres domisdé
L’Uniun Teater La Ila mët a jí n curs de teater por mitans y mituns cun Erika Castlunger tla Ciasa dla Cultura da La Ila vigni vëndres domisdé dai 27 de setëmber 2024 inant por 10 iadi:
dales 14:30 ales 15:30 por la 3a y 4a classa dla scora elementara, dales 16:00 ales 17:30 por la 5a classa dla scora ele­mentara y por la 1a, 2a y 3a classa dla scora me­sana. Informaziuns y iscriziuns pro Erika al numer 339 6288847.


Nodé y atletica por mitans y mituns 2024/2025
L’assoziaziun »Badiasport« mët a jí indô cursc y alenamënc da nodé y atletica
Prinzipianc
Badiasport organisëia indô n curs da nodé y atletica por prinzipianc (cun Cristina y Davide). Le curs vëgn tigní vigni lönesc domisdé tla nodadoia da La Ila, y atletica vigni mertesc por la spana de tëmp otober cina ma. L’iscriziun mëss gní fata cun le formular (d’atres iscriziuns por e-mail o telefonn ne gnará nia tutes en conscideraziun). Cost: 200,00 €
Alenamënc
Badiasport mët indô a jí cun otober alenamënc da nodé y atletica (cun Verena y Davide). Al vëgn insigné i stii lëde, spiné, arosch y delfin. Le training de altetica lisiera alza fora les ca­pazités de coordinaziun y de condiziun, al vëgn ince insigné les formes de basa dles singoles disciplines de atletica lisiera. Nodé vëgn tigní vigni jöbia tla nodadoia da La Ila, l’atletica lisiera vigni mertesc por la spana otober cina ma. L’iscriziun mëss gní fata cun le formular (d’atres iscriziuns por e-mail o telefonn ne gnará nia tutes en conscideraziun). Cost: 200,00 €
Nodé por adulc
Cun otober mët indô man »Nodé deboriada – nodé por adulc« cun Verena. Al vëgn insigné i 4 stili lëde, spiné, arosch y delfin, y mioré la coordinaziun y la condiziun. Le curs vëgn tigní tla nodadoia da La Ila vigni mertesc por la spana otober cina ma. Al ne se trata nia de n curs por prinzipianc, porchël vëgnel damané les capazités de basa da nodé.
L’iscriziun mëss gní fata cun le formular (d’atres iscriziuns por e-mail o telefonn ne gnará nia tutes en conscideraziun).
Iscriziuns www.badiasport.org/novite
Saus dl altonn
Por stlü jö la sajun tl’Alta Badia vëgnel metü a jí n’iniziativa liada ai produc locai y ales munts
Dai 15 de setëmber ai 6 de otober vëgnel metü a jí tl’Alta Badia l’iniziativa »Saus dl altonn«, che valorisëia i produc locai, les munts y la natöra che vëgn abelida dai corusc dl altonn. Les cater üties che tol pert al’iniziativa á chirí fora n produtur local cun so produt d’ezelënza, cun chël che ai jará spo a cherié n menü. Ai 15, 21, 22 y 29 de setëmber sarál vigni iade te n’atra ütia le produtur adüm al cogo dla ütia che presentëia le produt y le taí adöm a n’esperiënza particolara sciöche por ejëmpl na cercia de marmelades, acompagnada da musiga locala. Les üties pón arjunje a pe, cun la roda o cun i implanc portamunt che sará en funziun cina ai 6 d’otober 2024.
Tra­tan les trëi edemes pón ince tó pert a ativités desvalies sciöche na jita söl monn di funguns, le gosté da paur y tröc d’atri apun­tamënc. Por ciafé deplü informaziuns o por se prenoté a na escurjiun bastel jí sön la plata internet www.altabadia.org o ti ofizi turistics dl’Alta Badia.


»Memorial Paolo y Ente«
I Stüdafüch de Badia inviëia al iade a pe sön La Crusc en sabeda ai 28 de setëmber 2024 dales 9:30 por recordé Paolo y Ente
Le iade deboriada a pe (te na spazirada o ince te na saltada)  por recordé i compagns dla uniun di Stüdafüch á döes varian­tes: chëra plü lungia che pëia ia dan le magazin di Stüda­füch de Badia passan por Oies, y l’atra che é plü cörta y pëia ia da Castalta.
Marë­na y premiaziun vëgn tignides ala Ütia Tamá cun musiga dal vi.
Iscriziuns: Cosce, tel. 339 7006154 o söl post; infos: Arnold, tel. 333 8404845.