La Usc di Ladins

La é stata chiamèda ite en jebia ai 7 de november te la scoles populères de Masi de Ciavaleis la radunanza del BIM de la valèdes de la Veisc. L president Francesco Dellantonio Tasin dantfora l à volù rengrazièr l Consei Diretif col president Michele Bontempelli e i coleghes del Consorzie Vittorio Stonfer e Elena Ceschini, ensema a Maria Bosin (che à lascià su sia ancèria per esser stata litèda conseiera provinzièla, ndr) per l lurier portà inant te chisc 3 egn e mez ajache chesta l'era l’ultima radunanza de chest mandat.
A la prejenza de 24 ombolc sun 27 Comuns consorzié de la valèdes de la Veisc, l president à portà dant sia relazion e la proponeta de bilanz per i egn che vegn.
»Sion n Consorzie de Comuns - l à dit - che gestesc, te la cornisc de la lege 959/1953, ressorse di Comuns. Chesta consapevoleza ne à semper vidà te ogne dezijion che aon tout, vardan semper a n dialogh construtif e al contat col teritorie. Endana dut l mandat aon metù ju a na vida chiara nesc obietives che roda dintorn ai conzec de ‘energia’, ‘aga’ e ‘ambient’. Anter i prumes provedimenc che aon proponet l é stat smaorar la perzentuala destinada ai Pians de val che é stata portada dal 50% al 70% de le ressorse a bilanz.
Aon metù a la leta di Comuns de la valada de la Veisc per i egn 2021-2025 la soma de beleche 10 miliogn de Euro a fon perdù e zenza vincol de rendicontazion e destinazion e cherdon che chest ge aesse dat na bona bociada de ossigen a nesc Comuns, a desmostrazion de noscia gran atenzion. L auter 30% enveze l é jit a desvalives pians straordenaries desche chel del 2024 resservà ai lurieres per l miorament del bosserlait e le re de le aghe nete. De gra a chisc contribuc i Comuns à podù far lurieres emportanc per meter a post le condote sul teritorie.«

L president à dapò recordà l bon ejit de l’esperienza BIM-SOVA e la cordanza de program con la Provinzia e i autres BIM sul projet del fotovoltaich e di fregolares. »L empegn de 2 miliogn de euro che l Consorzie à metù per l projet fotovoltaich, de chel che se à miorà n muie de sentadins - l à dit - ne à fat vadagnar recognosciment da duc tant che la Provinzia ne à cernù per gestir 5 miliogn de euro per l projet fregolares e chest per noi l é rejon de gran orgolie.«
Gran atenzion del Consorzie é jita al teritorie. »Te chisc egn aon semper vardà de sostegnir le sociazion, la Protezion zivila e i Pians di Joegn per n total de beleche 1,2 miliogn de contribuc.«

De più su la Usc stampèda de en vender ai 15 de november del 2024