La Usc di Ladins

L mondo de la besties encanta prest duc chenc da picoi en su, ma fosc l à encantà chel tant de più Tommaso Defrancesco. Vintetrei egn e na stala sun Sèn Pelegrin, l an che vegn via per d’istà l fenirà l percors de cinch egn per doventèr vetrinarie a l’Università de Sassari. »Per me l é stat cinch egn senestres, ma olache me è godù tant e è emparà tant. Son dalbon content e chest l é pa demò l scomenz« chest l ne conta, canche pea via noscia telefonèda. Te la Tèlia l é demò 13 università ló che l é la Facoltà de Veterinaria: »I posć no i é tropes, Sassari l é una de le più picole. Pèdua e Milan rua a aer 7/800 scric ite. Autres fascegn? De chi che cognosce giö, nesciugn che fasc vetrinaria«. Aboncont, con el no rejonon demò de sie percors de studie e de chest mondo tant spezialistich, ma ence de reintroduzion de besties, del louf e de mostres de vaces.

Perché pa èste dezedù de tor chesta strèda? Co este ruà a Sassari?

Tommaso Defrancesco Per mie cont, ma peisse che sie valch mingol de duc i vetrinaries, l é valch che tu sente. Desche per l tosat che jà da picol l disc che l völ deventar vetrinarie, ence per me la é stata coscita. L é stat ence miöi genitores che i me à endrezà e te noscia stala è semper abù de bie ejempies. Chela de ruar a Sassari l é stat mingol na casualità, una de chele robe manco empensade ma vegnude più ben. Aee fat l test nazional a Pèdua: te la graduatoria, calcolè i ponts, le preferenze e l scoriment de la jent, giö son ruà te la Sardegna. Aeve valch cognoscenza, è scomenzà e en cajo me aee dit che aesse cambià. Ades posse dir che chigiò me è semper troà tant ben, coi compagnes e i professores: sion de dotrei cent studenc te facoltà e l é mingol descheche siane al liceo a Poza. I dozenc i te cognosc e i te aida se tu as besogn.

E fin ades, co éla jita?

L percors per deventar vetrinarie sorì no l sarà mai. La laurea la é a ziclo unich, cinch egn. Jà dal prim an l é belebon senester, tu tache subit a far duta l’anatomia. Se scomenza jà a aer l’impostazion de le desferenze: l’anatomia umana la é una, en veterinaria se taca con l’anatomia de basa de 5/6 specie… cian e giat chi più sorii, ciaval, porcel e i ruminanc con vace e fede. Ogne tant l professor l vegniva fora con ejempies del camel, cunié o autre sorice. Più se va inavant e più deventa na costion de prezijion e metodica, se fasc fisiologia, anatomia patologica e de auter. Al quarto an se scomenza a tratar clinica medica, entener colugn che l é i segnai de magagna de le bestie e segnai che do va tel chirurgich. L ultim an se fasc clinica medica e chirurgica: troar la diagnosi e dapò la terapia o l intervent chirurgich.

De più su La Usc stampèda de en vender ai 15 de november del 2024  (Nicoletta Riz)