La Usc di Ladins

Al é sté n domisdé dediché deplëgn ala leteratöra ladina, chël dl vëndres ai 15 de novëmber a La Pli de Mareo. Tres l’EPL–Ert por i Ladins y la Cooperativa de comunité "Por Mareo", nasciüda dal proiet PNRR "La Pli – n tesur da descurí", án orü ti lascé lerch ala parora ladina te dötes sües formes. L’ocajiun ê de un n vers le iubilé dla 10. ediziun dl Pest leterar Angelo Trebo, y dl ater vers la presentaziun dl Calënder Ladin 2025, che é gnü fora dan chinescdé frësch de stampa. Le presidënt dl’EPL Iaco Rigo y l’Ombolt de Mareo Felix Ploner á saludé i antergnüs a chësc domisdé, te chël che an á podü ciafé na cercia de tan rich che le lingaz ladin é y cun ci creativité leterara che al vir, crësc y florësc inant. Le professur Carlo Suani á damperfora pité na Analisa critica dl Pest Angelo Trebo, y spo ti án lascé lerch a n valgügn de sü protagonisć, na cerna de sis auturies y auturs che á tut pert al Pest ti agn. Daimproía él sté Rut Bernardi, Christian Ferdigg, Silvia Liotto, Mattia Maldonado, Simon Josef Rubatscher y Nadia Rungger che á pité na cercia de sües poesies. Inant ésera jüda cun la presentaziun de na publicaziun nöia.

Deplü ciafëise t’La Usc di Ladins di 22 de novëmber  (pablo)