La Usc di Ladins

Bondì Naomi, co te prejentásseto a zachei che no te cugnësc?
Mi son la Naomi, è vintivot agn e son fia de la Milva e del Paolo. È n fradel plu pico de mi, che à inom Naim. È tres vivëst nta Fodom, ulache è fat dute le scole da la elementara fin a la terza mesana e po son juda a studié a Persenon.

Percié esto juda a studié a Persenon?
Per l todësch! M’à tres sapù bel l lengaz todësch, ma eve bù la poscibilité de l fè demè i trei agn a la mesana e, ajache è tres bù ntel cé de laoré ntel ciámp turi­stich, è dezedù de fè le scole aute a Persenon.

Ci ne conteto de cánche t’eve tosata?
Mi è n bel ricordo dei agn da tosata: la vita no m’à resservé de gran sorpreje, me l’è vivësta con gran serenité. Co s’onva tosata è tres cianté ntel Pico Coro »Col de Lana« e ades, da n valgugn agn, ciánte ntel Coro de Gliejia da La Plié. Se esse da tò fora n bel moment n particolar, forsci l é sté cánche i miei à fat su cesa e on podù se trè sa La Court, via n Trëve, nte nosta bela cesa nuova. Chësta l é ben sté na gran sodisfazion per duta la fameia.