La Usc di Ladins

L é n uton de gran da fèr chel de l’Union di Ladins de Fascia. Do la bela Festa del Rengraziament l’ativitèdes no se à fermà, alincontra te chest meis de november l é stat endrezà adertura doi corsc. L president Fernando Brunel se à metù a la leta ence chest an per tegnir n cors de depenjer a la fascèna che l é tacà ite con na pruma scontrèda en jebia ai 7 e l va inant ogne mèrtesc e jebia fin ai 28 de november.

La tradizion di conscric se viventea con DJ Sem. La dependenta Letizia Soldà, che à fat l’Academia de Bela Èrts a Verona, la é do che la se dèsc ju ence con n auter projet. Tel chèder del Pian de Joegn La Risola, l’Union di Ladins à proponet n cors out ai conscric de la val per smaorèr sie enteres envers la tradizions e la cultura de noscia val, en particolèr chela belapontin di conscric. En vender ai 8 de november, te la bela e carateristica stala de la Ciasa de la Moniaria, se à troà 5 touses del 2007 che se enjigna a festejèr l travert di 18 egn con l an che vegn. Al projet se à scrit ite en dut 9 joegn da duta la val.
L projet ‘Conscric’ l é dassen particolèr ajache dut l é compagnà da la musega de DJ Sem, Samuel Cincelli, che l à remixà a na vida moderna e joena la cianties folk de gropes de musega cognosciui de Fascia. Per l’ocajion l à refat ence doi cianties de I Ladins e I Pazedins ciantèdes da Daniele Dorich e Riccardo Francesconi, doi conscric da Poza. La scontrèdes jirà inant ogne vender, se l é vèlch joen che aessa gust de tor pèrt l pel tor contat con Letizia, su whatsapp al numer 0462 764545.

De pià su La Usc stampèda de en vender ai 15 de november del 2024  (MCI)