La Usc di Ladins

La se à avert con trei interogazions del grop de mendranza la sentèda del Consei del Comun General de Fascia chiamèda ite en mèrtesc ai 12 de november a la prejenza de 21 conseieres. Do l salut da man del president del Consei General Cristoforo Debertol l é stat l capogrop del grop 'Fassa' Matteo Iori che à metù dant una a l'outa la interogazions. La pruma revardèa la restruturazion de la ex caserma Vittorio Veneto sun chela che l grop à semper palesà si dubies, tant su la destinazion del frabicat che sul iter che 'no permet l control di aministradores su la neva proponeta' vegn scrit tel document.
L Conseier de procura ai lurieres publics Carlo Ganz à let ju na longia resposta tel detai a duc i ponc de la interogazion. »L Consei de procura, fora che l conseier Amedeo Valentini - à dit Ganz - valuta positivamenter, per chel che l é de sia competenza, la corespondenza del projet venjidor a la domanes e ai requisic del DIP (Documento di indirizzo alla progettazione) en referiment ai obietives e ai besegnes calitatives e cantitatives de la proponeta projetuala.
L Conseier Ganz per responer al pont de la destinazion del nef frabicat l à dit che »la dezijion de far la neva senta del CGF con n picol cartier, e nia de auter, la é stata retegnuda strategica per defenir e plasmar per i egn che vegn n Ent che, aldò de le competenze stabelide da la lege, posse portar inant sia atività autonomamenter e l posse esser de referiment per i besegnes aministratives di Comuns e de duta la Comunanza.«
L'autra doi interogazions revardèa: la scontrèda su la circonvalazion Cianacei-Ciampedel a chela che i conseieres del CGF no é stac envié e n video manà fora sui social del Ent.

I conseieres à dapò lità duc a una per la designazion de Luca Pitolini desche raprejentant del Comun General per l nef Consei de Aministrazion de la Cèsa de Paussa aldò de la mudazion de sie Statut. La sentèda é jita inant con l'aproazion del Pian organich di intervenc de politica linguistica e culturèla per l an 2025, metù dant dal conseier de procura a la cultura Amedeo Valentini.

De più su La Usc stampèda de en vender ai 15 de november del 2024  (Monica Cigolla)