La Usc di Ladins

Letöres ladines y presentaziun dl Calënder Ladin 2025
A La Pli de Mareo tla Ciasa dles Uniuns, en vëndres ai 15 de novëmber, dales 15:00 inant
En gaujiun dla diejima ediziun dl Pest trienal de poesies ladines Angelo Trebo vëgnel invié ia en vëndres ai 15 de novëmber dales 15:00 tla Ciasa dles Uniuns a La Pli n domisdé leterar con auturies y auturs.
Te chësta ocajiun gnarál ince presenté le Calënder Ladin 2025. A chësta manifestaziun dl’uniun EPL-Ert por i Ladins é dötes y düc inviá!

»Paraisc y Infern«
Por le pröm iade vëgnel porté sön paladina n teater dla Uniun Teater Calfosch. Premiera ai 13 de novëmber
Da d’aisciöda él gnü metü sö na uniun dl teater cun jobleri ma da Calfosch. Le toch da rí che gnará porté sön paladina se tlama »Paraisc y Infern« y gnará rapresenté ai 13.11. (20:30), ai 15.11. (20:30), ai 17.11. (17:00), ai 20.11. (20:30) y ai 22.11. (20:30), tl salf dles manifestaziuns Franz A. Rottonara a Corvara. Al cunta la storia de n ombolt n pü’ furbo che röia adinfal sön paraisc. I jobleri é Daniel Pescollderungg (Armin), Elena Pescollderungg (Leni), Ellen Alfreider (Luzi), Luca Lucchini (Ordikus), Gabriel Colombani (Angel Custode), Ingrid Castlunger (Anna), Isabel Alfreider (Marta) y Arnold Costa (Guido). La rejia é de Annemarie Schenk, la souffleuse é Alexa Alfreider y la tecnica de Marie Valentini y Marco Valentin. An pó se prenoté preferibil­mënter tres WhatsApp al 342 9284675 (a usc ma dales 19:00 ales 21:30).

»Amur da tosser! Él amur sce...«
Serada cun mësa torona sura la violënza sön les ëres, ai 8 de novëmber dales 19:30, tl Istitut Ladin Micurá de Rü a San Martin de Tor
Vigni terza ëra o jöna á vit o vir na esperiënza de violënza. Te na fila de porsones, ól dí che la ëra sön mia man dërta o sön mia man ciampa vir o á vit na esperiënza pesocia de violënza! Le fat che tl 2023 él gnü copé 120 ëres y che chësc ann compëdon bele la 92. vitima, fej dër ponsé.
La violënza pó se mostré te n gröm de formes y fasettes. Gonot ne vëgnera te n pröm momënt gnanca odüda sciöche violënza. Canche le partner (baldi se tratera la gran pert dl ël, mo nia ma!) controlëia le fonin dla ëra, la ofënn o la sforza a aziuns sessuales nia orüdes, o la gelosia tla copia é esagerada, sce la ëra mëss dé jö sü davagns o ara ne á nia azes ai scioldi tla cassa, sce la ëra vëgn porsi­ghitada sön le post de laur o te ciasa: chëstes é formes de violënza dër subtiles, mo dër ries da soporté. Ares porta a n gran pëis psichich y fisich che porta la porsona a ne ester nia plü bona da vire normalmënter.
Mo ci stá pa do ia? Co vára pa da controlé plü saurí situaziuns de agresciun o ince da azeté plü saurí canche na storia é rovada? Ci rode á pa la ëra te nosta sozieté y ciun pa l’ël? Cun ci valurs pa? Ci y che pó pa daidé da ciafé na soluziun?
Adöm ai referënc de chësta serada Ingrid Palfrader – responsabla dl Sorvisc Ciasa dles ëres Val de Puster, Giuliana Franchini – psico­loga y psicoterapista, Michael Benetti – Caritas Consulënza por ëi, Jasmin Ferdigg – mode­radëssa y jornalista y Simon Kostner – mode­radú y regista, ciararunse a deplü aspec de chësta tematica che dess se sensibilisé a ciaré plü avisa. Düc é dër bel inviá, ince al pice renfrësch che sará dedô por se baraté fora.

»Na frizia de fortüna«
Le Teater La Pli inviëia ala comedia popolara da indoman, sabeda ai 9 de novëmber, inant
Sot ala regia de Franz Rigo gnarál mostré sön paladina dla Ciasa dles Uniuns a La Pli de Mareo le toch da rí de Ulla Kling »A Zipferl vom Glück« trasporté tl ladin mareo y tla realté ladina da Franz Rigo, che á ince sura la regia.
Indoman, sabeda ai 9 de no­vëmber 2024, dales 20:00, sarál la pröma cun renfrësch, les atres dates de rapresentaziun é: domënia ai 10.11. dales 15:00, sabeda ai 16.11. dales 20:00, domënia ai 17.11. dales 15:00 y sabeda ai 23.11. dales 20:00. Les chertes pó gní comanades danfora dales 17:00 ales 20:00, al nr. de telefon 389 8158382.

Curs »I Ladins y les Dolomites«
Tl

• 
•  

View the embedded image gallery online at:
https://www.lausc.it/manifestazions-y-evenc/28225-manifestazions-atuales-speziales#sigProId550b88f9d1

proiet »La Pli – n tesur da descurí«, vëgnel organisé ai 12 y ai 19 de novëmber n curs cun Matteo Ruggeri, dal titul »I Ladins y les Dolomites: na storia danter alpinism, turism y nazionalism«
Ci pert â pa les munts tl imaginar coletif ladin da n iade? Co gnô pa chëstes odüdes dai pröms turisć che rovâ adalerch te nostes valades? Y co s’á pa spo mudé l’imaja de nostes munts cun i movimënc culturai moderns cina aldedaincö?
L’idea dles munts é dagnora ince n produt sozio-cultural, deache ares vëgn vites aladô de coche vigni porsona les sënt. Porchël á l’alpinism, le turism y le nazionalism albü na pert fondamentala da formé identités nöies y sozietés desvalies.
Le jonn badiot Matteo Ruggeri, colauradú scientifich dl Istitut Ladin Micurá de Rü, é tl laur da fá n stüde de dotorat sön la storia di ladins y laora ince tl ciamp dla lessicografia y cultura ladina. Te döes incuntades nes cuntarál dla storia dl alpinism te nostes valades y di svilups che á porté pro a na conscidraziun nöia de nostes munts y ala formaziun de nosta identité ladina.
Chësc curs é por dötes les porsones inte­ressades ala storia de nüsc raiuns y che laora tl turism. Al vëgn tigní ai 12 y ai 19 de novëmber dales 17:00 ales 19:00, tl salf di cursc dl Istitut Ladin a San Martin de Tor. Iscriziunr por mail a matteo@micura.it o al numer 0474 523110. La partezipaziun é debann, por n numer mascim de 15 porsones.
Le curs vëgn metü a jí en colaboraziun cun l’Istitut Ladin Micurá de Rü, tl cheder dl proiet dl Comun de Mareo »La Pli – n tesur da descurí«, finanzié dal Minister por la Cultura tres le PNRR.

Scrí dërt por ladin: n curs a San Martin
Tla cornisc dl proiet »La Pli – n tesur da descurí« vëgnel metü a jí n curs cun Werner Pescosta, dal titul »Scrí dërt por ladin: co pón pa fá, a ci desson pa ciaré?«. Le curs é debann y ponsé por porsones che laora tles aministraziuns publiches, scores, uniuns, y assoziaziuns che scrí y publichëia tesć por ladin
Le ladin é n lingaz che vëgn dantadöt baié, te familia, cun compagns y colegs. Tröc tesć plü scëmpli ti vá ince do ala forma orala. Mo co éra pa te n contest profescional o istituzional, sciöche tl’aministraziun publica? O tl monn de uniuns y assoziaziuns che scrí y publichëia tesć por ladin?
Aldedaincö él stromënc danman che dëida da scrí dërt por ladin, coche na gramatica, dizionars y regoles de grafia. Porimpó ne basti nia dagnora: an mëss ince savëi da i adoré tla dërta manira, por ester bogn da scrí n test che ti vá do ales carateristiches dl ladin y nia dl talian o dl todësch.
Por fá bela figöra él important ch’an ciares impröma da pronunzié dërt les parores y da adoré la dërta sintassa, tignin cunt dles cara­teristiches particolares dl ladin y dles desfa­rënzies en confrunt ai atri lingac ch’i conesciun.
Werner Pescosta é n colauradú scientifich dl Istitut Ladin Micurá de Rü. Al se dá jö da tröc agn incá cun la storia di ladins, mo ince cun la redaziun y traduziun de de vigni sort de tesć. Al á porchël tröpa esperiënza da scrí por ladin.
Tratan so curs partí sö te cater in­cuntades gnarál analisé val’ situaziuns tipiches, olach’an ne mët sovënz nia averda coch’an baia, y zacotan d’ejëmpli de tesć sön argomënc che n’é nia da vignidé, olach’an perd plü saurí le contat cun les formes ladines, ciumpedan te formes tipiches dl talian o dl todësch.
Le curs vëgn tigní les jöbies ai 14.11., 21.11., 28.11. y 12.12.2024, dales 17:00 ales 18:00 tl salf di cursc dl Istitut Ladin a San Martin. L’iscriziun é debann y é da fá pro werner@micura.it o al numer 0474 523110. Destinatars é porsones che laora tles amini­straziuns publiches (comuns, provinzia, scores), uniuns y assoziaziuns che scrí y publi­chëia tesć por ladin.

Stëres de stran tl Museum
Ai 20 de novëmber él tl Museum Ladin Ciastel de Tor n domisdé por mitans y mituns dala 3. ala 5. elementara y dla mesana, olache an impara da fá stëres de stran
Le Museum Ladin inviëia a n domisdé creatif, en mer­cui ai 20 de novëmber dales 15:00 ales 16:30, tl MusLa Ciastel de Tor.
Descuriun adöm la vedla tradiziun da fá stëres de stran y porvun da nen fá n valgönes instësc. Le laboratore é por mitans y mituns dla 3., 4. y 5. elementara y dla mesana acompagná.
I periun do na prenota­ziun a prenotaziuns@musem ladin.it o 0474 524020. Le cost é de 5,00€ a möt/a.

Le Rait de San Linert dles valades ladines y de Südtirol
La 24ejima ediziun dl Rait de San Linert, che gnará metüda a jí en domënia ai 10 de novëmber, sará dedicada ai 120 agn dla uniun di ciavai norics dla Val Badia
Le Rait de San Linert mët man ince en chësc ann bele la sabeda ai 9 de novëmber, cun n conzert di grups ladins »Julian Moling+Wisetime Band«, »Alexander dal Plan« y le grup »Wise­time«, dales 18:30 tla tënda dlungia la Ciasa J. B. Runcher a Badia, olache al vëgn ince dé fora da mangé. La domënia jará inant la festa cun la santa mëssa dales 9:00 tla dlijia de Badia y dales 10:45 podarán odëi la defilada da Pedraces cina a San Linert, a chëra che al tolará pert plü de 100 ciavai haflinger y norics dles valades ladines y de döt Südtirol.
Chisc gnará spo benedis pro le paiun da pert de siur Degan. Al sará ince musighes y i grups dl bal popolar che abelirá la festa y an podará odëi i ciars infornis sö y güces cun guanc da zacan.
Iubilé por la uniun di ciavai y le Rait en streaming
L’ediziun da en chësc ann é dedicada ai 120 agn dl’uniun di norics dla Val Badia. Do la benedisciun, jará la festa inant cun musiga sides tla ciasa dles uniuns a Badia che tla tënda, olache al vëgn dé fora spezialités gastronomiches da pert dles uniuns di paurs, di stödafüch y dla Musiga de Badia. La Rait vëgn ince mostré en streaming sön le canal Facebook dl’Alta Badia y la manifestaziun vëgn tignida ince sce al ess da ester bur’ tëmp.

Sentada generala y referat
Le Consëi de formaziun de Badia inviëia a döes iniziatives te öna na sëra: la reuniun generala y n referat sura i gragn predaturs
En lönesc ai 11 de novëmber pîta le Consëi de formaziun Badia döes ini­ziatives tla medema sëra, tla Ciasa J. B. Runcher a Badia. Dales 18:30 sarál la reuniun generala dl Consëi de forma­ziun cun la presentaziun dles iniziatives 2024, la presentaziun dl program 2025 y les lîtes dl consëi nü.
Dales 20:00 vára inant cun le referat cun discusciun sot al titul »Großraub­wild (Wolf, Luchs, Bär) in der Kultur­land­schaft und die Auswirkungen davon« (Gragn predaturs – lu, lostrel, laurs – tla contrada culturala y les con­se­guënzes). Referënt é Luca Com­plojer, che á studié gestiun dla fauna salvaria y mëmber dla Federaziun Provinziala dla Ciacia de Südtirol.